راہل کی بھارت جوڑو نیائے یاترا کی شروعات کل

امپھال (یو این آئی) کانگریس لیڈر راہل گاندھی کی بھارت جوڑو نیائے یاترا اتوار 14 جنوری کو منی پور کی راجدھانی امپھال کے بجائے ریاست کے تھوبل ضلع کے تاریخی کھونگ جونگ سے شروع ہوگی۔مسٹر گاندھی کی قیادت میں کانگریس نے یہاں ہپت کانگجیبنگ پیلس گراؤنڈ سے یاترا شروع کرنے کی اجازت مانگی تھی، لیکن سیکورٹی انتظامات کا حوالہ دیتے ہوئے انتظامیہ نے محدود لوگوں کے ساتھ یاترا شروع کرنے کی اجازت دی، چنانچہ امپھال کے بجائے کانگریس نے ریاست کے تھوبل ضلع سے یاترا کا آغاز کرنے کا فیصلہ کیا۔
یاترا کے موقع پر آج یہاں ایک پریس کانفرنس سے خطاب کرتے ہوئے کانگریس کمیونیکیشن ڈپارٹمنٹ کے انچارج جے رام رمیش نے کہا کہ اگرچہ مسٹر گاندھی کی امپھال سے یاترا کے لیے اجازت نہیں دی گئی تھی، لیکن یہ یاترا اتوار کو منی پور سے شروع ہوگی اور کانگریس صدر ملکارجن کھڑگے منی پور کے تھوبل ضلع سے یاترا کو جھنڈی دکھائیں گے۔
انہوں نے کہا کہ یہ یاترا آمریت، پولرائزیشن اور بڑھتی ہوئی معاشی عدم مساوات اور جمہوریت کو ‘آمریت’ میں تبدیل کرنے والی پالیسیوں کے خلاف شروع کیا جا رہا ہے۔ نیائے یاترا شمال مشرقی پانچ ریاستوں میں 11 دنوں تک چلے گی اور مسٹر گاندھی سفر کے دوران ہر روز ایک جلسہ عام سے خطاب کریں گے۔
مسٹر رمیش نے کہا کہ مودی حکومت کے 10 سالہ دور میں ملک کے عوام نے ناانصافی کو برداشت کیا ہے اور اب امرت دور کے سنہرے خواب دکھا کر ایک دہائی کی ناانصافی کو نظر انداز کرنے کی کوشش کی جارہی ہے۔ انہوں نے کہا کہ اس ناانصافی کے خلاف ملک کے لوگوں کو متحد کرنے کے لیے مسٹر گاندھی کی قیادت میں شروع کی جا رہی نیائے یاترا 66 دنوں تک چلے گی اور اس دوران 6200 کلومیٹر کا سفر طے کیا جائے گا۔