نئی دہلی، 22 نومبر (یو این آئی) عام آدمی پارٹی (آپ) نے کہا کہ وزیر اعظم نریندر مودی کے دوست اڈانی کی بدعنوانی کی وجہ سے ہندوستانی سرمایہ کاروں کے 5.50 لاکھ کروڑ روپے دوب گئے ہیں۔آپ کے راجیہ سبھا ایم پی سنجے سنگھ نے جمعہ کو کہا کہ مسٹر مودی جب بھی غیر ملکی دوروں پر گئے ہیں، ان کے دوست اڈانی کو ان ممالک میں بڑے سودے ملے ہیں، وہ ملک کے نہیں بلکہ اڈانی کے وزیر اعظم ہیں۔ وزیر اعظم ہندوستان کو مضبوط کرنے کے لیے نہیں بلکہ اپنے دوست اڈانی اور اپنے کاروبار کو مضبوط کرنے کے لیے بیرون ملک سفر کرتے ہیں۔ اڈانی کی بدعنوانی کی وجہ سے ملک میں عوام کی محنت کی کمائی کے تقریباً ساڑھے پانچ لاکھ کروڑ روپے ضائع ہوئے، لیکن وہ خاموش ہے۔
انہوں نے کہا کہ امریکہ کی تحقیقاتی ایجنسی نے بتایا ہے کہ گوتم اڈانی کے بھتیجے ساگر اڈانی نے افسران کو 2200 کروڑ روپے کی رشوت دے کر مہنگی بجلی فروخت کی ہے۔ رشوت ستانی کے ثبوت ملنے کے بعد ہی امریکی عدالت نے گوتم اڈانی اور ساگر اڈانی کے خلاف وارنٹ گرفتاری جاری کیے ہیں۔ جب امریکہ میں اڈانی کے خلاف تحقیقات چل رہی ہیں تو ہندوستان میں سی بی آئی، ای ڈی اور سی بی آئی خاموش کیوں بیٹھے ہیں؟
آپ لیڈر رینا گپتا نے کہا کہ آج پورے ملک میں ہنگامہ مچا ہوا ہے۔ اس ملک کے عوام کے تقریباً ساڑھے پانچ لاکھ کروڑ روپے اسٹاک مارکیٹ میں ضائع ہوگئے کیونکہ وزیراعظم کے دوست اڈانی نے بدعنوانی کی تھی۔ اس سے قبل جب ہنڈن برگ رپورٹ آئی تھی تو ملک کے عوام کا کروڑوں روپے کا نقصان ہوا تھا لیکن حکومت اور وزیراعظم خاموش رہے۔ ملک کے عوام نے جو ساڑھے پانچ لاکھ کروڑ روپے گنوائے اس کا حساب کون دے گا؟
