تلنگانہ کے کانگریس لیڈرسید عظمت اللہ حسینی کی ملکارجن کھرگے سے ملاقات

حیدرآباد ( ہندوستان ایکسپریس ویب ڈیسک ) : تلنگانہ پردیش کانگریس تشہیری کمیٹی کے کنوینر سید عظمت اللہ حسینی نے دہلی میں کانگریس کے قومی صدر ملکارجن کھرگے سے ملاقات کی اور ریاست کی تازہ سیاسی صورتحال پر تبادلہ خیال کیا ۔سیاست نیوزکے مطابق سید عظمت اللہ حسینی نے بتایا کہ قومی صدر بننے کے بعد ان کی ملکارجن کھرگے دہلی میں پہلی خیر سگالی ملاقات تھی ۔ ریاست کے کئی سینئیر قائدین سے کانگریس کے قومی صدر نے ملاقات کی ۔ ٹی آر ایس اور بی جے پی حکومتوں کے عوام دشمن پالیسیوں کا جہاں جائزہ لیا گیا وہیں کانگریس پارٹی کے استحکام پر بھی بات چیت ہوئی ہے ۔ ملکارجن کھرگے نے پارٹی کے تمام قائدین کو عوام کے درمیان پہونچنے ان کے مسائل پر جدوجہد کرنے کی ہدایت دی ہے ۔ انہوں نے بتایا کہ وہ راہول گاندھی کی بھارت جوڑو یاترا کے دوران قومی صدر بننے کے بعد پہلی مرتبہ حیدرآباد کا دورہ کرچکے ہیں ۔ جہاں کانگریس کے مقامی قائدین سے ملاقات کے دوران عوامی مسائل سے واقفیت حاصل کرنے کا موقع ملا ہے ۔ سونیا گاندھی نے تلنگانہ عوام کے جذبات کا احترام کرتے ہوئے علحدہ تلنگانہ ریاست تشکیل دیا ہے لیکن موجودہ ٹی آر ایس حکومت علحدہ ریاست کے ثمرات سے عوام کو محروم کررہی ہے اور ایک بھی وعدے کو پورا نہیں کیا ہے ۔ دوسری جانب بی جے پی فرقہ پرستی کے ایجنڈے پر عمل کرتے ہوئے عوام کو تقسیم کررہی ہے ۔ ٹی آر ایس اور بی جے پی کے خلاف کانگریس پارٹی کے قائدین عوام میں شعور بیدار کریں اور کانگریس پارٹی کو اقتدار حاصل کرنے کے لیے عوامی مسائل پر بڑے پیمانے پر احتجاج کریں ۔۔ ن