دہشت گردی انسانیت کی توہین: سکریٹری جنرل اقوام متحدہ

نیویارک: اقوام متحدہ کے سکریٹری جنرل انٹونیو گوٹیرس نے دہشت گردی کو ’انسانیت کی توہین‘ قرار دیتے ہوئے عالمی برادری سے مطالبہ کیا کہ وہ اس کے خلاف ہتھیار نہ ڈالیں۔انہوں نے یہ ریمارکس ’پرتشدد انتہا پسندی کی روک تھام‘ کے پہلے عالمی دن کے موقع پر کئے۔اقوام متحدہ کے سربراہ نے دہشت گردی کو انسانیت کی توہین قرار دیتے ہوئے کہا کہ یہ ان اقدار کو مجروح کرتی ہے جو ہمیں ایک دوسرے کے ساتھ جوڑتی ہیں۔انہوں نے کہا کہ دہشت گردی سے امن و سلامتی کے فروغ، انسانی حقوق کے تحفظ، انسانیت کو امداد کی فراہمی اور پائیدار ترقی کے فروغ کے لیے اجتماعی کوششوں کو بھی خطرہ ہے۔ان کا کہنا تھا کہ ہمیں پہلے سے زیادہ چوکنا رہنے کی ضرورت ہے، دہشت گرد اور متشدد انتہا پسند گروہ انٹرنیٹ پر اپنے زہر کو پھیلانے کے لیے زرخیز زمین اور نرم نشانے تلاش کر رہے ہیں۔انٹونیو گوٹیرس نے کہا کہ نیو نازی، سفید فام بالادستی کی تحریکیں دن بدن زیادہ خطرناک ہوتی جارہی ہیں اور اب یہ کئی ممالک میں داخلی سلامتی کے لیے سب سے بڑے خطرے کی شکل اختیار کرتی جارہی ہیں۔ان کا کہنا تھا کہ تمام ممالک کو اس چیلنج کی روک تھام کے لیے اقدامات کرنا ہوں گے اور ان تمام حالات سے نمٹنا چاہیے جو دہشت گردی کا سبب بنتے ہیں۔انہوں نے اقلیتوں، خواتین اور نوجوانوں کے حقوق کے تحفظ پر زور دیتے ہوئے کہا کہ انسانی حقوق کو انسداد دہشت گردی کی تمام پالیسیوں کا محور ہونی چاہیے۔ سکریٹری جنرل نے کہا کہ آج اور اس کے بعد ہر دن ہم ایسے پرامن، جامع اور مستحکم معاشرے کی تعمیر کیلئے مل کر کام کریں گے جس میں دہشت گردی اور پرتشدد انتہا پسندی کیلئے کوئی جگہ نہ ہو۔ دسمبر میں منظور ہونے والی ایک قرارداد میں اقوام متحدہ کی جنرل اسمبلی نے 12 فروری کو پرتشدد انتہا پسندی کی روک تھام کا عالمی دن قرار دینے کا فیصلہ کیا تھا تاکہ پرتشدد انتہا پسندی سے منسلک خطرات کے بارے میں آگاہی پیدا کی جاسکے۔ قرارداد میں اس بات کی تصدیق کی گئی کہ دہشت گردی اور پرتشدد انتہا پسندی کا کسی مذہب، قومیت، تہذیب یا نسلی گروہ سے تعلق نہیں ہو سکتا اور نہ ہی ہونا چاہیے۔ دنیا کے مختلف ممالک میں دہشت گردی کے واقعات رونما ہوتے رہے ہیں جن میں بڑی تعداد میں معصوم لوگوں کی جانیں گئی ہیں ۔ تمام عالمی پلیٹ فارم سے یہ بات کہی گئی ہے کہ دہشت گردی کا کسی بھی مذہب ‘ فرقہ ‘ طبقہ یا نسلی گروہ سے کوئی تعلق نہیں ہوتا ۔ دہشت گردی انسانیت کے خلاف ہے اور تمام ممالک کو اس کے خلاف متحدہوکر کوششیں کرنی چاہئے۔