گریڈیہ، 17 نومبر (یو این آئی) جھارکھنڈ کے وزیر اعلیٰ ہیمنت سورین نے آج کہا کہ صرف جھارکھنڈ مکتی مورچہ (جے ایم ایم) ہی جھارکھنڈ کی ترقی کر سکتا ہے، اس لیے عوام کو اس الیکشن میں جے ایم ایم امیدوار کو بھاری ووٹوں سے کامیاب بنانے کی ضرورت ہے۔اسمبلی انتخابات کے دوسرے مرحلے کے تحت 20 نومبر کو ہونے والی ووٹنگ کو لے کر انتخابی سرگرمیاں تیز ہوگئی ہیں۔ مختلف سیاسی جماعتوں کی جانب سے اپنے اپنے امیدواروں کے حق میں جلسہ عام کا انعقاد کیا جا رہا ہے۔ اسی سلسلے میں، اتوار کو بوڈو میں ہوائی اڈے کے قریب جے ایم ایم کی طرف سے ایک جلسہ عام کا اہتمام کیا گیا، جس میں وزیر اعلیٰ مسٹر سورین نے شرکت کی اور عوام سے اپیل کی کہ وہ گریڈیہ اسمبلی حلقہ سے جے ایم ایم کے امیدوار سودیویہ کمار سونو کو کامیاب بنائیں۔
اس دوران جلسہ عام سے خطاب کرتے ہوئے مسٹرسورین نے گزشتہ پانچ برسوں میں کئے گئے ترقیاتی کاموں کا ذکر کیا۔ انہوں نے کہا کہ وزیر اعلیٰ بنتے ہی کووڈ وبا کا سامنا کرنا پڑا۔ اس دوران حکومت نے عوام کے مفاد میں ہر قسم کے کام کیے اور عوام کو بچایا۔ انہوں نے کہا کہ جے ایم ایم کی حکومت بنتے ہی جھارکھنڈ مرکزی حکومت کے لاتعلق رویہ کے باوجود ترقی کی طرف گامزن ہوا۔ خواتین اور بہنوں کو عزت دیتے ہوئے میا سمان یوجنا کا آغاز کیا، جس کے ذریعے خواتین اور لڑکیوں کے بینک کھاتوں میں 1000 روپے بطور امداد دیے جا رہے ہیں۔ اگر اس بار دوبارہ حکومت بنتی ہے تو 1000 روپے بڑھا کر 2500 روپے کر دیے جائیں گے۔
جلسہ عام سے خطاب کرتے ہوئے امیدوار کم ایم ایل اے سدیویہ کمار سونو نے اپنے ترقیاتی کاموں کا ذکر کیا۔ انہوں نے کہا کہ انہوں نے پانچ سال کے دوران گریڈیہ اسمبلی میں جتنا ترقیاتی کام کیا ہےاتنا سابقہ ایم ایل اے دس برسوں کے دور میں بھی نہیں کرسکے تھے۔
راجیہ سبھا ایم پی سرفراز احمد، پرنب ورما، جے ایم ایم کے ضلع صدر سنجے سنگھ نے بھی جلسہ عام سے خطاب کیا۔
