مدھوبنی، 8 دسمبر (یواین آئی) شمالی بہارکے جھنجھارپوربلاک میں واقع دینی وعصری تعلیم کے مثالی و معیاری تربیت گاہ’ مدنی پبلک اسکول سنگرام‘ میں اسکو ل کے سرپرست مولانا سیداسجدمدنی نائب صدرجمعیۃعلماء ہند کی آج آمدہوئی۔اسکول انتظامیہ نے ان کے اعزازمیں ایک پروقارتقریب کاانعقادکیا۔اس موقع پرمولانا سید اسجد مدنی نے طلباء و طالبات سے خطاب کرتے ہوئے کہا کہ ہمیں آج کے بدلتے ہوئے حالات میں اپنے دین وایمان پر مضبوطی سے کاربندرہتے ہوئے جدیدتعلیم کے حصول میں آگے بڑھنے کی کوشش کرنی چاہئے۔ ہمارے لئے سب سے پہلے ایمان کی حفاظت اوراس کی بقاضروری ہے۔
انہوں نے کہاکہ اسلام کسی بھی نافع علم کے حصول میں ہرگزمانع نہیں ہے بلکہ ہمیں اپنے ایمان پر کاربندرہتے ہوئے آگے بڑھناہے اوراس میں نمایاں کامیابی حاصل کرنی ہے۔
انہوں نے مزیدکہاکہ آپ سب اپنے اندر قوت یقین پیدا کریں جس سے آپ کے اندر خود اعتمادی پیدا ہوگی اور خوداعتمادی کامیابی کا پہلا زینہ ہے جس کے سہارے آپ آگے کی منزل آسانی سے عبورکرسکتے ہیں اورملک وملت کیلئے کارآمدبن سکتے ہیں۔
انہوں نے اسکول کے اساتذہ، منتظم اورطلباکے ڈسپلن کا بغورجائزہ لینے کے بعد اپنے اعتمادکا اظہارکرتے ہوئے کہا کہ مجھے یقین ہے کہ آپ اسی لگن اورجذبہ کے ساتھ اسکول کی تعلیمی ترقی میں اپنابھرپورکردارادا کریں گے اور ضروری تبدیلیوں کو نافذ کرنے کے لیے اسکول انتظامیہ کے ساتھ مل کر کام کریں گے۔آپ سب کے مخلصانہ اقدامات سے طلبا کے لیے مثبت ماحول پیدا کرنے میں ہمیں آسانی ہوگی۔
اس دوران اسکول کے طلباوطالبات کے درمیان موسم سرماکو دیکھتے ہوئے مولانا مدنی نے اپنے ہاتھوں سے سوئیٹرس اورجیکٹ بھی تقسیم کئے جسے پاکر طلباوطالبات بہت خوش نظرآرہے تھے۔
قابل ذکر ہے کہ مولانا مدنی کایہ دورہ ’مولانا حسین احمد مدنی ایجوکیشنل ٹرسٹ دیوبند کے تحت چلنے والے ادارہ کی تعلیمی ترقی کا جائزہ اوراسکول انتظامیہ کی حوصلہ افزائی تھا، تقریب کے اہم شرکاء میں مولانا حیدرالاسلام قاسمی نائب صدرجمعیۃعلماء بہار،محمد سعداللہ منتظم اسکول، مولانا ظفراللہ قاسمی پرنسپل اسکول، مولانا ارشادعالم ندوی، اسکول کے تمام ہی اساتذہ کرام، محمد رشیدسابق مکھیہ سنگرام، قاری فرقان، ماسٹر امجد، شرف عالم،علاقہ کے معززین اوربچوں کے والدین قابل ذکرہیں۔
