کانگریس وقف ترمیمی بل کے خلاف : راجیش

پٹنہ، 26 مارچ (یو این آئی) بہار کانگریس کے صدر راجیش کمار نے کہا کہ پارٹی وقف ترمیمی بل کے خلاف احتجاج کرنے والی تنظیموں کی پرزور حمایت کرے گی۔کانگریس نے مرکز میں بھارتیہ جنتا پارٹی (بی جے پی) کی قیادت والی قومی جمہوری اتحاد (این ڈی اے) حکومت کے ذریعہ لائے گئے وقف ترمیمی بل کی مخالفت کرنے والی اقلیتی تنظیموں کی طرف سے بلائے گئے گردنی باغ دھرنے کے مقام پر احتجاج کی حمایت کی ہے۔ اس سلسلے میں بہار کانگریس کا وفد آج احتجاجی مقام پر پہنچا اور وقف ترمیمی بل کی مخالفت کرنے والی احتجاجی تنظیموں کی حمایت کی۔ وفد نے احتجاج کرنے والی اقلیتی تنظیموں کی حمایت کی اور کانگریس پارٹی کی حمایت کا اظہار کیا۔ وفد نے متفقہ طور پر کہا کہ مرکز کی بی جے پی حکومت کی طرف سے اقلیتوں کو نشانہ بنایا جا رہا ہے اور ہراساں کیا جا رہا ہے، جو کہ غلط ہے اور کانگریس پارٹی ان کے حقوق کے لیے سڑکوں سے ایوان تک لڑے گی۔
کانگریس کے صدر راجیش کمار نئی دہلی میں اعلیٰ لیڈروں کے ساتھ میٹنگ کی وجہ سے احتجاج میں شامل نہیں ہو سکے لیکن انہوں نے کہا کہ جب وہ پٹنہ آئیں گے تو وہ تمام تنظیموں بشمول امارت شرعیہ کے نمائندوں سے ملاقات کریں گے اور ان کے مسائل کو مناسب پلیٹ فارم پر اٹھائیں گے۔ انہوں نے کہا کہ حکومت کو ہمارے اقلیتی برادری کے بھائیوں اور ان کی تنظیموں کے خیالات کو سنجیدگی سے سننا چاہیے۔ میں یقین دلانا چاہتا ہوں کہ میں اور میری کانگریس پارٹی وقف ترمیمی بل کے خلاف اس تحریک کے ساتھ مضبوطی سے کھڑے ہوں گے۔ کانگریس پارٹی مرکزی حکومت کے تمام آمرانہ فیصلوں کے خلاف لڑ رہی ہے۔
کانگریس صدر نے کہا کہ آج گردنی باغ پٹنہ میں میں وقف ترمیمی بل کے خلاف منعقد احتجاج کی حمایت کرتا ہوں۔ انہوں نے کہا کہ سیکولرازم ہندوستانی آئین کی روح ہے۔ جے ڈی یو پارٹی جو بہار میں بی جے پی کے ساتھ اقتدار میں ہے، وقف ترمیمی بل پر اپنا موقف واضح کرے کہ آیا یہ آئین کی روح کے مطابق ہے یا نہیں۔
احتجاج کو حمایت دینے کے لئے بہار کانگریس کے نمائندے میں شامل ہوئے۔ ان میں ایم ایل اے پرتیما داس، میڈیا ڈپارٹمنٹ کے چیرمین راجیش راٹھور، اقلیتی ڈپارٹمنٹ کے چیرمین عمر خان، سابق چیرمین منت رحمانی سمیت دیگر لیڈران نے گردنی باغ پہنچ کر وقف بورڈ کے مفادات کی حمایت میں اپنے خیالات پیش کیے اور کانگریس کی حمایت کا اعادہ کیا۔