تہران، 3 دسمبر(یو این آئی) ایران میں سونے کا بڑا ذخیرہ دریافت ہو گیا ہے۔مقامی میڈیا نے رپورٹ کیا کہ ایران نے ملک کی سب سے بڑی کانوں میں سے ایک میں سونے کا ایک بڑا ذخیرہ دریافت کرنے کا اعلان کیا ہے۔سونے کی کان ’شادان‘ جنوبی خراسان میں واقع ہے جو ملک کی اہم ترین کانوں میں سے ایک ہے، ایران کی وزارتِ صنعت، معدن و تجارت نے نئے ذخائر کی باضابطہ توثیق کر دی ہے۔یہ ذخیرہ رگوں کی شکل میں دکھائی دیتا ہے، جیسے ایک وسیع طلائی رگ ہو، اس طلائی ذخیرے میں تقریباً 7.95 ملین ٹن آکسائیڈ اور 53.1 ملین ٹن سلفائیڈ سونا موجود ہے۔
ایران نے اگر چہ اپنے قومی زرِسونا (سونے کے ذخائر) کی مقدار باضابطہ طور پر ظاہر نہیں کی ہے، لیکن اس کا دعویٰ ہے کہ اس نے حالیہ برسوں میں سونے کی خریداری میں خاطر خواہ اضافہ کیا ہے۔گزشتہ ستمبر میں ایران کے مرکزی بینک کے گورنر محمد رضا فرزین نے کہا تھا کہ بینک 2023–2024 میں دنیا کے پانچ سب سے بڑے سونا خریدنے والے مرکزی بینکوں میں شامل تھا۔ بینک ذرائع نے کہا کہ سونے کے ذخائر میں اضافے سے بین الاقوامی پابندیوں کے بوجھ تلے دبی ہوئی ملکی معیشت کو تقویت ملے گی۔واضح رہے کہ ایران میں سونے کی 15 کانیں ہیں جن میں سب سے بڑی کان ملک کے شمال مغرب میں واقع زرشوران ہے۔ سونا عام طور پر ایرانیوں کے لیے بھی ایک محفوظ سرمایہ کاری یا اثاثہ ہے کیوں کہ بڑھتی ہوئی مہنگائی اور ڈالر کے مقابلے میں ایرانی ریال کے دائمی انحطاط کی وجہ سے ان کی قوتِ خرید کم ہوتی جا رہی ہے۔
