نئی دہلی(ہندوستان ایکسپریس ویب ڈیسک):مودی سرکار نے اعلیٰ رہنماؤں کے غیر ملکی دوروں پر ہونے والے اخراجات کی تفصیلات جمعرات کو پارلیمنٹ میں پیش کیں۔ اس دوران حکومت کی طرف سے بتایا گیا کہ 2019 سے لے کر اب تک وزیر اعظم نریندر مودی نے 21 غیر ملکی دورے کیے ہیں جن پر 22.76 کروڑ روپے سے زیادہ خرچ ہوئے ہیں۔ہندی اخبار جن ستا کی خبر کے مطابق وزیر مملکت برائے امور خارجہ وی مرلی دھرن نے راجیہ سبھا میں بجٹ اجلاس کی کارروائی کے دوران ایک سوال کے تحریری جواب میں یہ جانکاری دی۔ انہوں نے کہا کہ صدر نے 2019 سے اب تک آٹھ غیر ملکی دورے کیے ہیں جن پر 6.24 کروڑ روپے سے زیادہ کی رقم خرچ کی گئی ہے۔ مرلیدھرن نے بتایا کہ 2019 سے حکومت نے صدر کے دورے پر 6,24,31,424 روپے، وزیر اعظم کے دورے پر 22,76,76,934 روپے اور وزیر خارجہ کے دورے پر 20,87,01,475 روپے خرچ کیے ہیں۔ مرلیدھرن نے کہا کہ 2019 کے بعد سے صدر نے آٹھ غیر ملکی دورے کیے، جب کہ وزیر اعظم نے 21 اور وزیر خارجہ ایس جے شنکر نے 86 غیر ملکی دورے کیے ہیں۔ 2019 سے، وزیر اعظم مودی تین بار جاپان، دو بار امریکہ اور ایک بار متحدہ عرب امارات کا دورہ کر چکے ہیں۔ آٹھ صدارتی دوروں میں سے سات رام ناتھ کووند نے کئے تھے جبکہ موجودہ صدر دروپدی مرمو نے گزشتہ ستمبر میں برطانیہ کا دورہ کیا تھا۔
