جامعہ ملیہ اسلامیہ میں ’جے ایم آئی کین کون: اورل آنکولوجی’ کے موضوع پر سمپوزیم‘

نئی دہلی(ہندوستان ایکسپریس ویب ڈیسک): ڈینٹسٹری فیکلٹی کے شعبہ اورل اینڈ میکسیلو فیشیل سرجری،جامعہ ملیہ اسلامیہ نے’جے ایم آئی کین کن: سمپوزین آن اورل آنکولوجی‘ کے موضوع پر گیارہ فروری دوہزار تئیس کو ایف ٹی کے۔سی آئی ٹی ہال،جامعہ ملیہ اسلامیہ میں ایک سمپوزیم منعقد کیا۔جامعہ ملیہ اسلامیہ کے شعبہ تعلقات عامہ کی جانب سے جاری کردہ ریلیز کے مطابق پروفیسر نجمہ اختر(پدم شری) شیخ الجامعہ،جامعہ ملیہ اسلامیہ پروگرام کی سرپرست اور سمپوزیم کے سرپرست پروفیسر ناظم حسین الجعفری،مسجل،جامعہ ملیہ اسلامیہ نے پروگرام کو غیر مشرو ط تعاون دیاہے۔پروگرام کی منتظمہ کمیٹی میں سرپرست اور ڈین پروفیسر (ڈاکٹر) سنجے سنگھ،آرگنائزنگ چیئر پرسن پروفیسر (ڈاکٹر) محمد فیصل،جوائنٹ آرگنائزنگ چیئر پرسن، پروفیسر (ڈاکٹر)سید انصار احمد،آرگنائزنگ سکریٹری،پروفیسر(ڈاکٹر)عمران خان،جوائنٹ آرگنائزنگ سیکریٹری،ڈاکٹر دیبوراہ سائی بل، سائنٹفک کوآرڈی نیٹر،ڈاکٹر افرا اختراور متعلقہ فیکلٹی کے دیگر شعبہ جات کے فیکلٹی اراکین شامل ہیں۔
پروگرام ان معنوں میں بے حد کامیاب رہاکہ اس میں سو سے زیادہ شرکا بہ نفس نفیس شریک رہے۔علاوہ ازیں،قومی اہمیت کے اداروں اور اسپتالوں جیسے کہ آرمی ڈینٹل کارپس(آراینڈ آر) علی گڑھ مسلم یونیورسٹی،بنارس ہندو یونیورسٹی،مولانا آزاد انسٹی ٹیوٹ آف ڈینٹل سائسنز،آئی ٹی ایس ڈینٹل کالج،مرادنگر جے پی ہاسپٹل اورمیکس ہاسپٹل وغیرہ سے متعدد ماہرین آئے تھے۔پروگرام کے افتتاحی اجلاس کی صدارت مہمان خصوصی برگ(ڈاکٹر) ایس۔کے رائے چودھری (سینا میڈل)آرمی اسپتال (آر ایند آر) نئی دہلی کے پروفیسراور کنسلٹنٹ (او ایم ایف ایس) نے کی۔پروگرام کا آغا ز تلاوت کلام پاک سے ہوا۔اس کے بعد آرگنائزنگ چیئرپرسن پروفیسر(ڈاکٹر)محمد فیصل نے مہمانوں اور سامعین کا استقبال کیااور ڈین کا خطبہ پروفیسر (ڈاکٹر)سنجے سنگھ نے دیا۔اپنے افتتاحی خطبے میں مہمان خصوصی برگ (ڈاکٹر) ایس کے رائے چودھری،ایس ایم نے پروگرام کے مرکزی خیال کی دل کھول کر تعریف کی ساتھ ہی اس کی تشکیل اور انجام دہی کی بھی ستائش کی اور اس بات کی تجویزرکھی کہ اس طرح کا پروگرام باقاعدگی سے ہوتے رہنا چاہیے۔انھوں نے اسٹیج پر جلوہ افروز مہمانوں اور مندوبین اور مقررین کوبھی اس موقع پر تہنیئت پیش کی۔آرگنائزنگ سیکریٹری پروفیسر (ڈاکٹر)عمران خان کے اظہار تشکرکے بعد قومی ترانہ گایا گیا اور اس کے ساتھ ہی پروگرام اپنے اختتام کو پہنچا۔
سمپوزیم میں شرکت کے لیے پانچ ممتاز مقررین اور بارہ مشہور ومعروف چیئر پرسن کو مدعو کیا گیا کہ وہ اپنے بیش قیمت تجربات سے پروگرام کی وقعت و اہمیت میں اضافہ کریں گے۔’اورل کینسر‘ کے موضوع پر یہ سمپوزیم اپنی نوعیت کا منفرد پروگرام تھا۔اس میں اورل کینسر کی تشخیص،جانچ اور مینجمنٹ کے موضوعات سے متعلق ڈاکٹر سعید الاسلام(میڈیکل کینسر اسپتال، مغربی بنگال)ڈاکٹر مہتاب احمد(اے ایم یو) ڈاکٹر نتن لیکھا(جے پی اسپتال) ڈاکٹر روہت چندرا(میکس اسپتال) اور ڈاکٹر اکھیلش سنگھ (بی ایچ یو) کے معلمانہ لیکچرز اور خطبات تھے۔
ڈاکٹر سعید الاسلام(میڈیکل کینسر اسپتال، مغربی بنگال) نے کرانیو فیشل ریکنسٹرکٹیو سرجرسی کے موضوع پر کلیدی خطبہ دیاجو کہ پورے پروگرام کا اہم ترین حصہ تھا۔اس کے بعد ’اورل کینسرکے مینجنمٹ میں اختلافات و تنازعات‘کے موضوع پر پینل ڈسکشن تھا۔ مباحثے کے ہمارے اراکین ڈاکٹر روہت پنگا، ڈاکٹر نتن لیکھا اور ڈاکٹر اکھیلش سنگھ تھے جنھوں نے سرگرمی کے ساتھ مباحثے میں شرکت کی۔پروگرام کا اختتام مختلف کالج کے پوسٹ گریجویٹ طلباکے لیے ایک کوئز مقابلے سے ہوا جس کاعنوان ’آنکوپیڈیا کوئز‘ تھا۔مجموعی طورپر پروگرام انتہائی کامیاب رہا جس سے بیش قیمت تجربات حاصل ہوئے۔اس نے اورل کینسر سے متعلق اساتذہ،ڈاکٹروں اور طلبا کی معلومات کو بہتر کرکے اور علاج میں ان کے تفہیمی افق کو وسعت دے کرسب کے لیے دروازے کھول دیے ہیں۔