عالمی یوم قدس کے موقع پر مدرسۃ الزہرا میں لیکچرکا اہتمام

لکھنؤ:عالمی یوم قدس کی مناسبت سے آج مدرستہ الزہرا،واقع امام باڑہ غفرآن مآب میں ’’انتفاضۂ القدس اور استعمار کا توسیع پسندانہ نظام‘‘ کے موضوع پر دو لیکچرز کا اہتمام کیا گیا ۔پہلے لیکچر میں مولانا منہال زیدی نے طالبات کو خطاب کرتے ہوئے کہاکہ قبلۂ اول پر مسلمانوں کا پہلا حق ہے ،اس لئے قبلۂ اول کی بازیابی کے لئے تمام مسلمانوں کو استعماری طاقتوں کے خلاف متحد ہونا ہوگا۔انہوں نے کہاکہ اسرائیل نے فلسطینیوں کی سرزمین کو غصب کیاہے ،جس کی آزادی کے لئے جدوجہد ہم سب پر فرض ہے ۔’صدی معاہدہ ‘ کے ذریعہ جس طرح اسرائیل نے امریکہ کے ساتھ مل کر فلسطینیوں کے بنیادی حقوق پر ڈاکہ ڈالنے کی کوشش کی تھی ،وہ اب ناکام ہوچکی ہے ۔استعمار کا توسیع پسندانہ منصوبہ بھی کامیاب نہیں ہوا اور فی الوقت اسے ہر محاذ پر شکست نصیب ہوئی ہے ۔مولانانے کہاکہ قبلۂ اول کی بازیابی،فلسطینی مظلوموں کی حمایت اور اسرائیلی جارحیت کے خلاف عالم اسلام کو متحد ہونا ہوگا۔بغیر مسلمانوں کے اتحاد کے قدس کی بازیابی ممکن نہیں ۔
دوسرے لیکچر میں مولاناغلام رضا رضوی نے طالبات کو خطاب کرتے ہوئے کہاکہ اسرائیل جس طرح مسجد اقصیٰ میں نمازیوں پر تشدد کررہاہے اور مظلوم فلسطینیوں کو مارتا رہتاہے ،اس کی عالمی سطح پر مذمت ہونی چاہیے ۔افسوس یہ ہے کہ اقوام متحدہ بھی استعماری چالوں کا شکار ہے اور فلسطینی مظلوموں کی حمایت میں اسرائیلی بربریت کے خلاف کوئی مناسب اقدام نہیں کیا جاتا۔تنہا ایران ہے جو اس مسئلے کو زندہ رکھے ہوئے ہےاور ہمیشہ مظلوموں کی حمایت میں سینہ سپر رہتاہے۔اسرائیل اور حماس کے درمیان گیارہ روزہ جنگ کے موقع پر بھی عالم اسلام خاموش تماشائی بناہوا تھا،جبکہ اس وقت سب کو مشترکہ طورپر اسرائیلی دہشت گردی کے خلاف کھڑاہونا چاہیے تھا۔مولانا نے کہاکہ اگر عالم اسلام اپنے اتحاد کا مظاہرہ کرتاتو یروشلم کبھی اسرائیل کا پایۂ تخت تسلیم نہیں کیاجاتا۔انہوں نے کہاکہ مسئلہ فلسطین مرجعیت کا مرہون منت ہے اور آج بھی رہبر معظم آیت اللہ خامنہ ای مدظلہ العالی فلسطین کے مسئلے پر نہایت حساس اور سنجیدہ ہیں ۔مولانا غلام رضا رضوی نے فلسطینی سرزمین پر اسرائیلی قبضے کی مختصر تاریخ بھی طالبات کے لئے پیش کی ۔
اس پروگرام میں مدرسۃ الزہرا کی طالبات نے شرکت کی ۔انتظامات کی ذمہ داری مدرسے کی منیجر خواہر تسنیم جعفری نے نبھائی ۔تقاریر کے دوران مدرسے کی طالبات نے اسرائیل مردہ باد،امریکہ مردہ کے نعرے لگائے ،ساتھ ہی فلسطینی مظلوموں کی حمایت میں بھی نعرے لگائے گئے ۔مجلس علمائے ہند نے اس پروگرام کے انعقاد میں تعاون پیش کیا۔