امروہہ میں بی جےپی امیدوار کی مخالفت میں لگے بینر

امروہہ:17مارچ(یواین آئی) اترپردیش کے امروہہ پارلیمانی حلقے میں کسانوں نے بی جےپی امیدوار کے بائیکاٹ اور گاؤں میں داخلہ ممنوع لکھے بورڈ، بینر لگائے ہیں۔
الیکشن کمیشن کے ذریعہ انتخابات کے اعلان کے اگلے دن سے ہی بی جے پی کے اعلان شدہ امیدوار سابق ایم پی کنور سنگھ تنور کی مخالفت میں امروہہ کے گاؤں میں جگہ جگہ بینر پوسٹ لگائے گئے ہیں۔
دیہاتیوں نے یونائیٹڈ کسان مورچہ کے اہم جزو بھارتیہ کسان یونین (چڑھونی) کے بینر تلے اتوار کو بی جے پی امیدوار کنور سنگھ تنور کا اپنے اپنے گاؤں میں بائیکاٹ کیا اور ان کے گاؤں میں داخلے پر بھی پابندی لگانے سے متعلق بورڈ اور بینر لگے ہوئے ہیں۔
بی کے یو کے ضلع صدر نریش چودھری نے کہا کہ جس طرح مرکز کی مودی حکومت نے کسانوں کے دہلی میں داخلے پر پابندی عائد کی تھی، اسی طرح کسانوں نے فیصلہ کیا ہے کہ وہ بھی بھارتیہ جنتا پارٹی (بی جے پی) کے امیدواروں کو اپنے گاؤں میں داخل نہیں ہونے دیں گے۔انہوں نے الزام لگایا کہ بی جے پی حکومت کے دعوے اور وعدے صرف انتخابی اعلان تک محدود ہیں۔ مغربی اتر پردیش کے گاؤں کی حالت زار کسی سے ڈھکی چھپی نہیں ہے۔