بی جے پی حکومت نے عوام کی مشکلات میں اضافہ کیا: بھوپیش بگھیل

شملہ (یو این آئی) چھتیس گڑھ کے وزیر اعلی بھوپیش سنگھ بگھیل نے جمعرات کو کہا کہ ہماچل پردیش میں ضمنی انتخابات میں شکست کا سامنا کرنے پروزیر اعلی کا بیان آیا تھا کہ پارٹی کی شکست کے پیچھے بے روزگاری اور مہنگائی ہے۔
مسٹر بگھیل نے کہا لیکن پھر بھی ریاست میں بے روزگاری اور مہنگائی میں کمی نہیں آئی ہے۔
مسٹر بگھیل نے کہا کہ بھارتیہ جنتا پارٹی (بی جے پی) نے جو وعدے کئے تھےاس کے برعکس ہوا ہے، آج تک کالا دھن واپس نہیں آیا لیکن ہماری ماؤں اوربہنوں کے گھر میں رکھے ہوئے پیسے پر بھی بی جے پی نے ہاتھ صاف کیا ہے۔ سجان پور کے تاریخی چیگان میں کانگریس کی جن سنکلپ ریلی کے دوران مسٹر بگھیل نے وزیر اعلیٰ جئے رام ٹھاکر پر سخت حملہ کرتے ہوئے کہا کہ ہماچل میں وزیر اعلیٰ نے بے روزگاری اور مہنگائی میں کمی نہیں کی بلکہ لوگوں کی تکالیف میں اضافہ کیا ہے۔
انہوں نے کہا کہ جہاں پر بی جے پی کی حکومتیں ہیں وہاں پر ہی پیپر لیک کے معاملے کیوں سامنے آئے ہیں، مدھیہ پردیش، اتر پردیش، ہماچل، بہار میں بھی پیپر لیک کے معاملے آتے ہیں۔ انہوں نے الزام لگایا کہ جہاں بی جے پی کی حکومتیں ہیں وہاں پیپر فروخت کئے جاتے ہیں اورسرکاری بھرتیوں کوبند کیا جارہا ہے۔
اس موقع پرریلی میں خاص طور پر کانگریس کے انچارج راجیو شکلا، پنجاب کے اپوزیشن لیڈر پرتاپ سنگھ باجوا، ریاستی کانگریس پارٹی مہم کمیٹی کے صدر سکھوندر سنگھ سکھو، قائد حزب اختلاف مکیش اگنی ہوتری، پارٹی کے شریک انچارج گورکیرت سنگھ کوٹلی اور تیجندر سنگھ بٹو سمیت کانگریس کے ورکنگ صدر راجندر رانا بھی موجود تھے۔