نئی دہلی، 17 اگست (یو این آئی) لوک سبھا میں قائد حزب اختلاف راہل گاندھی نے بھارتیہ جنتا پارٹی (بی جے پی) کو نوجوان مخالف قرار دیتے ہوئے اتر پردیش میں اساتذہ کی بھرتی پر ہائی کورٹ کے فیصلے کو اس کی پالیسیوں پر طمانچہ قرار دیا اور کہا کہ یہ فیصلہ سماجی انصاف کے لیے لڑنے والے ہر جنگجو کی جیت ہے۔
مسٹر گاندھی نے کہاکہ "69,000 اسسٹنٹ اساتذہ کی بھرتی پر الہ آباد ہائی کورٹ کا فیصلہ بی جے پی حکومت کی سازشوں کا مناسب جواب ہے جو ریزرویشن سسٹم کے ساتھ کھیل رہی ہے۔ یہ نہ صرف امیت موریہ جیسے ہزاروں نوجوانوں کی جیت ہے جو پانچ سالوں سے سردیوں، گرمیوں اور بارشوں میں سڑکوں پر مسلسل جدوجہد کر رہے ہیں بلکہ سماجی انصاف کے لیے لڑنے والے ہر جنگجو کی بھی جیت ہے۔
انہوں نے کہاکہ ‘ریزرویشن چھیننے پر بی جے پی کے اصرار نے سینکڑوں بے قصور امیدواروں کے مستقبل کو تاریکی میں دھکیل دیا ہے۔ جن لوگوں کو پانچ سال کی ٹھوکریں کھانے کے بعد نئی فہرست کے ذریعے ملازمتیں ملیں گی اور جن کے نام اب منتخب فہرست سے کاٹے جا سکتے ہیں، ان میں واحد قصوروار بی جے پی ہے۔
کانگریس لیڈر نے کہاکہ ’’بی جے پی حکومت، جو تعلیم حاصل کرنے والوں کو لڑنے پر مجبور کرتی ہے، دراصل نوجوانوں کی دشمن ہے۔‘‘
