ملک میں حقوق انسانی کی پامالی باعث تشویش:فورم اگینسٹ ماب لنچنگ اینڈان جسٹس

نئی دہلی(پریس ریلیز) ۔فورم اگینسٹ ماب لنچنگ اینڈان جسٹس کے بینر تلے عالمی یوم صداقت کے موقع پر امبیڈکر سماج پارٹی کے قومی دفتر میں صحافیوں سے بات کرتے ہوئے بھائی تیج سنگھ کنوینر فورم اگینسٹ ماب لنچنگ اینڈان جسٹس و قومی صدر امبیڈکر سماج پارٹی نے ملک میں بڑھتے حقوق انسانی کی پامالی اور آئینی بحران پر تشویش کا اظہار کرتے ہوئے موجودہ حکومت کو تنقید کا نشانہ بنایا ۔انھوں نے کہا کہ بے لگام بھیڑ کے ذریعے اقلیتوں کی ماب لنچنگ اور دلتوں پر بڑھتے بے پناہ ظلم کو دیکھ کر ایسا لگتا ہے کہ ملک کے حکمرانوں نے آئین کو بالائے طاق رکھ کر سنگھ کے ایجنڈے کو بالواسطہ طور پر نافذ کرنا شروع کر دیا گیا ہے ایسے میں آج حقوق انسانی کی تحفظ کے لئے عالمی یوم صداقت پر میں ملک کے تمام سچے محب وطن کو دعوت دیتا ہوں کہ وہ تما م تر آپسی اختلافات کو مٹاکر آئین اور انسانیت کی تحفظ کے لئے متحد ہو کر سچی سیاست کو فروغ دیں ۔
اس موقع پر بھائی تیج سنگھ نے موجودہ مرکزی حکومت کی کارکردگی پر برہمی کا اظہار کر تے ہوئے کہا کہ وزیر اعظم نریندر مودی جس کی آئین کی وجہ سے وزیر اعظم بنے ہیں اسی آئین کو مٹانے کے لئے سنگھ کا ساتھ سنگھ کا وکاس اور سنگھ کا وسواس پر عمل پیرا ہیں ۔ایسے میں درجہ فہرست ذاتوں ،امبیڈکر وادیوں اور ملک کے تمام اقلیتوں کو انسانی حقوق کی پامالی کو روکنے کے لئے اور ایماندار سیاست کو فروغ دینے کے لئے متحدہ لائحہ عمل طے کرنا ضروری ہے ۔
قومی جنرل سکریٹری حافظ غلام سرور نے بھی ملک میں پھیلی غیر اعتمادی اور جانبدارانہ سیاسی ماحول پراظہار افسوس کرتے ہوئے ملک کے وزیر اعظم سے آئین کی تحفظ کو یقینی بنانے اور ملک کے اقلیتوں اور دلتوں میں اعتماد بحال کرنے کی اپیل کی اور ملک کی بڑی آبادی کو خوف سے باہر نکالنے کے لئے ذمہ داران افسران کو سخت حکم جاری کرنے کی بھی اپیل کی ۔اس موقع پر امبیڈکر سماج پارٹی کے قومی دفتر کا افتتاح بھی عمل میں آیا ۔