منڈی، 14 مئی (یواین آئی ) ہماچل پردیش کے منڈی پارلیمانی حلقہ سے کانگریس کے امیدوار اور تعمیرات عامہ کے وزیر وکرمادتیہ سنگھ نے کہا ہے کہ منڈی کو ملک کا ایک مثالی پارلیمانی حلقہ بنانے کے لیے یہاں کے لوگوں کی بنیادی سہولیات کو وسعت دی جائے گی۔ سنگھ نے کہا کہ ریاست کی کانگریس حکومت پوری طرح سے مضبوط اور مستحکم ہے اور اپنی مدت پوری کرے گی۔منگل کو منڈی ضلع کے سراج اسمبلی حلقہ کے چھتری، گاڑھاگوسین اور تھاٹا (گھنیار) میں اپنی انتخابی ریلی سے خطاب کرتے ہوئے مسٹر سنگھ نے کہا کہ سراج علاقہ پھلوں اور سبزیوں کی پیداوار کے لیے مشہور ہے۔ ریاستی حکومت نے کیڑے مار ادویات اور فنگسائڈزپر سبسڈی بحال کرکے کسانوں اور باغبانوں کو بڑی راحت دی ہے۔ دودھ کی امدادی قیمت میں اضافہ کرکے جانوروں کے فارمرز کو بھی ریلیف دیا گیا ہے۔ سیب کی پیکنگ کے لیے یونیورسل کارٹن کو لازمی قرار دے دیا گیا ہے۔
انہوں نے کہا کہ رکن اسمبلی بننے کے بعد وہ سیب کی درآمدی ڈیوٹی بڑھانے کا معاملہ پارلیمنٹ میں اٹھائیں گے۔سنگھ نے کہا کہ ان کے والد مرحوم ویربھدر سنگھ جو ریاست کے چھ بار وزیر اعلیٰ رہے، نے ریاست کی ترقی کو جو رفتار دی، اب وہ مرکز میں جا کر اس رفتار کو مزید تیز کریں گے۔ انہوں نے کہا کہ منڈی کو اسمارٹ سٹی کا درجہ دینا، نرسنگ کالج کھولنا اور رام پور میں میڈیکل کالج کھولنا ان کی اہم ترجیحات ہیں۔ اس علاقے میں سیاحت کو فروغ دیا جائے گا تاکہ علاقے کے بے روزگاروں کو ان کی دہلیز پر روزگار کے مواقع مل سکیں۔
سنگھ نے کہا کہ منڈی میں ان کا سامنا بھارتیہ جنتا پارٹی کے ایک ایسے امیدوار سے ہے جسے تاریخ یا اس پارلیمانی حلقے کے بارے میں کوئی علم نہیں ہے۔ وہ اپنے ڈائریکٹر کے لکھے ہوئے اسکرپٹ کو پڑھتی ہیں۔ انہوں نے بی جے پی کی امیدوار اور فلم اداکارہ کنگنا رناوت کو چیلنج کیا کہ اگر ان میں ہمت ہے تو وہ ان کے ساتھ منڈی کے سیری اسٹیج پر ایک کھلے فورم میں علاقے کی ترقی کے وژن کے حوالے سے بحث کریں۔ انہوں نے کہا کہ وہ وزیراعظم کی تعریف کرکے انتخابی میدان میں کھڑی ہیں۔ انہوں نے کہا کہ وہ منڈی کے لوگوں کو گمراہ نہیں کر سکتیں۔
سنگھ نے کہا کہ کنگنا جے رام ٹھاکر کے گلے کی ہڈی کی بن گئی ہے جسے نہ نگلا جا رہا ہے اور نہ ہی اگلا جا رہا ہے۔ انہوں نے ٹھاکر سے کہا کہ وہ بتائیں کہ وہ خواتین سمان ندھی کے حق میں ہیں یا مخالف میں۔ انہوں نے کہا کہ خواتین کے لیے ایسی ہی ایک اسکیم بی جے پی کی حکومت والی مدھیہ پردیش میں چل رہی ہے لیکن بی جے پی ریاست میں اس کی مخالفت کر رہی ہے۔ انہوں نے کہا کہ ریاستی حکومت خواتین کو بااختیار بنانے کے لئے پوری طرح پابند ہے اور 6 جون کے بعد ریاست کی تمام اہل خواتین کو سمان ندھی اسکیم کے مکمل فوائد فراہم کئے جائیں گے۔سنگھ نے عوام سے اپیل کی کہ وہ انہیں بھاری ووٹوں سے جیت کر دہلی بھیجیں اور وہ کسی بھی پارٹی کی سیاست سے اوپر اٹھ کر ریاست کی مجموعی ترقی کے لیے آواز کو مضبوط کریں گے۔
