راجستھان میں کانگریس پھراقتدار میں آئے گی – گہلوت

جے پور (یو این آئی) راجستھان کے وزیر اعلی اشوک گہلوت نے اپنی حکومت کی کامیابیوں کو گناتے ہوئے دعویٰ کیا کہ ان کے کام کی وجہ سے عوام نے فیصلہ کیا ہے کہ اس بار ریاست میں دوبارہ کانگریس کی حکومت بنے گی۔مسٹر گہلوت نے کانگریس کے مشرقی راجستھان کینال پروجیکٹ (ای آر سی پی) کو قومی پروجیکٹ کا درجہ نہ دینے پر مرکزی حکومت کے خلاف عوامی بیداری مہم کے آغاز کے موقع پر باران جاتے ہوئے سہ پہر جے پور ہوائی اڈے پر میڈیا سے بات چیت کرتے ہوئے یہ بات کہی۔ انہوں نے کہا کہ ریاستی حکومت نے صحت، تعلیم، پانی، بجلی، سماجی تحفظ وغیرہ میں کئی تاریخی اسکیموں کو لاکر نافذ کیا ہے۔انہوں نے کہا کہ ریاست میں تقریباً ایک کروڑ لوگوں کو پنشن دی جا رہی ہے اور تین لاکھ سے زیادہ لوگوں کو ملازمتیں دی گئی ہیں اور ایک لاکھ کنٹریکٹ ورکرس کے لیے روزگار کا راستہ کھول دیا گیا ۔انہوں نے کہا کہ عوام یہی چاہتے ہیں اور ہماری حکومت نے یہ سب کچھ دیا ہے۔ انہوں نے کہا کہ عوام اور پارٹی کارکنوں نے مشکل حالات میں ہمارا ساتھ دیا، چاہے وہ کورونا کا دور ہو یا بی جے پی والوں کے ذریعہ حکومت گرانے کا معاملہ۔ پچھلے پانچ برسوں میں ایک یا دوسرا واقعہ ہوتا رہا۔وزیر اعلیٰ نے کہا کہ جس طرح سے بی جے پی لیڈروں نے منتخب حکومت کو گرانے کی سازش کی، عوام اس سے آج بھی ناراض ہیں اور وہ سبق سکھائیں گے۔ انہوں نے کہا کہ اس بار کانگریس کو پھر سے عوام کا آشیرواد ملے گا۔