سپول، 02 مئی (یو این آئی) وزیر دفاع راج ناتھ سنگھ نے آج کہا کہ کانگریس پارٹی اپنے وجود کے لیے اپنی آخری سانسیں لے رہی ہے اور اگلے دس برسوں کے اندر اس کا خاتمہ ہو جائے گا اور کوئی اس کا نام تک لینے والا نہیں ہوگا۔آج گاندھی میدان میں منعقدہ انتخابی میٹنگ سے خطاب کرتے ہوئے مسٹر سنگھ نے کہا کہ ملک کو آزادی ملنے کے بعد بابائے قوم مہاتما گاندھی نے کہا تھا کہ کانگریس کا نام ختم کر کے ملک کی سیاست کی جائے لیکن نہیں، یہ لوگ اس نام کی بنیاد پر برسوں تک اقتدار پر قابض رہے لیکن اب ان کا آخری وقت آگیا ہے۔
انہوں نے کہا کہ کانگریس کے دور حکومت میں غریبی مٹاؤ کا نعرہ دے کر عوام کو دھوکہ دیا گیا۔ غریبوں کے نام پر بڑے پیمانے پر بدعنوانی ہوئی لیکن آج غریبوں کا پیسہ سیدھا غریبوں کے کھاتوں میں جا رہا ہے۔ نریندر مودی جیسے ہی 2014 میں ملک کے وزیر اعظم بنے انہوں نے بدعنوانی کو ایک چیلنج کے طور پر لیا اور جن دھن یوجنا پروگرام کے تحت ملک کے کروڑوں غریبوں کے بینکوں میں کھاتے کھلوائے۔
وزیر دفاع نے کہا کہ کانگریس اور آر جے ڈی بہار میں دوبارہ لالٹین کا دور لانے کا خواب دیکھ رہے ہیں جو کبھی پورا نہیں ہوگا۔ لالٹین کے دور میں بہت زیادہ بدعنوانی ہوئی تھی، جس کے بارے میں بہار کا ہر شخص جانتا ہے۔ اس لیے لالٹین کا دور کبھی بہار میں واپس نہیں آنے والا ہے۔ میٹنگ کو بہار حکومت کے وزیر بیجندر پرساد یادو اور وزیر نیرج کمار سنگھ ببلو اور ایم ایل اے رام ولاس کامت نے بھی خطاب کیا۔
