نئی دہلی:غالب انسٹی ٹیوٹ کی ذیلی شاخ ’ہم سب ڈرامہ گروپ‘ کے زیر اہتمام اردو ڈرامہ فیسٹول کا افتتاح بدست محترمہ ماہرہ احمد سومر 20/ نومبر کو ایوان غالب میں ہوا۔ اس موقع پر غالب انسٹی ٹیوٹ کے ڈائرکٹر ڈاکٹر ادریس احمد نے کہا کہ غالب انسٹی ٹیوٹ کا دائرہ صرف علمی مذاکرات کے انعقاد تک محدود نہیں ہے۔
اس ادارے کی ذیلی شاخ ’ہم سب ڈرامہ گروپ‘ ایک فعال گروپ ہے جس نے ڈرامے کی دنیا میں فعال کردار پیش کیا ہے۔ اس شاخ کی بنیاد مرحومہ عابدہ احمد نے رکھی تھی۔ ان کا منصوبہ تھا کہ اس شاخ کے ذریعے اردو میں ڈرامے کی روایت کو ترقی دی جائے۔ مجھے خوشی ہے کہ آج اس فیسٹیول کا افتتاح بیگم عابدہ احمد صاحبہ کی پوتی محترمہ ماہرہ احمد سومر صاحبہ کے دست مبارک سے ہو رہا ہے۔ افتتاحی اجلاس کے بعد پیئرٹ ٹروپ کی پیشکش ڈرامہ ’سرسید‘ تحریر و ہدایت ڈاکٹر محمد سعید عام پیش کیا گیا۔جس میں سر سید احمد خاں کا کردار جناب تحسین منور نے بڑی خوبی سے نبھایا۔ اس موقع پر ڈرامے سے دلچسپی رکھنے والے افراد نے کثیر تعداد میں شرکت کی۔
