ویمنز ٹی 20 ورلڈ کپ 2023 کے گروپ بی کے میچ میں روایتی حریف پاکستان کو شکست
کیپ ٹاؤن (یو این آئی) جمائمہ روڈریگس (53 ناٹ آؤٹ) کی شاندار نصف سنچری اور رچا گھوش (31 ناٹ آؤٹ) کی دھماکہ خیز اننگ کی بدولت ہندوستان نے اتوار کو ویمنز ٹی 20 ورلڈ کپ 2023 کے گروپ بی کے میچ میں روایتی حریف پاکستان کوسات وکٹوں سے شکست دے دی۔
پاکستان نے پہلے بلے بازی کرتے ہوئے ہندوستان کے سامنے 150 رنوں کا ہدف رکھا، جسے ہندوستان نے 19 اوورز میں ہی حاصل کر لیا۔
پاکستان کو اس چیلنجنگ اسکور تک لے جانے کے لئے کپتان بسمہ معروف نے 55 گیندوں پر سات چوکوں کی مدد سے 68 رنز کی نصف سنچری اننگ کھیلی، جبکہ عائشہ نسیم نے 25 گیندوں پر دو چوکوں اور دو چھکوں کی مدد سے 43 رنوں کا تعاون دیا۔
یہ ہندوستان کے خلاف ٹی ٹوئنٹی انٹرنیشنل میں پاکستان کا سب سے بڑا اسکور تھا، لیکن روڈریگس اور ریچا کی جوڑی نے بسمہ کی محنت پر پانی پھیر دیا۔ روڈریگس نے ہندوستانی اننگ کو استحکام دیتے ہوئے 38 گیندوں پر آٹھ چوکوں کی مدد سے 53 رنز بنائے جبکہ ریچا نے 20 گیندوں پر پانچ چوکوں کے ساتھ 31 رنوں کی تابڑ توڑ اننگ کھیلی۔ ہندوستان کے تین وکٹ 93 رنز پر گرنے کے بعد، دونوں نے صرف 33 گیندوں میں 57 رنز کی شراکت داری کرکے ٹیم کو فتح تک پہنچا دیا۔
خواتین کے ٹی ٹوئنٹی ورلڈ کپ کی تاریخ میں یہ دوسرا سب سے بڑا رن کا تعاقب ہے۔ یہ اس ٹورنامنٹ میں ہندوستان کا سب سے بڑا کامیاب رن تعاقب بھی ہے۔ اس جیت کے ساتھ ہی ہندوستان گروپ بی میں دوسرے نمبر پر آگیا ہے جبکہ انگلینڈ ویسٹ انڈیز کو شکست دے کر پہلے نمبر پر ہے۔
ہندوستان نے ہدف کے تعاقب میں اچھا آغاز کیا۔ اسمرتی مندھانا کی غیر موجودگی میں اوپننگ کے لیے آنے والی یستیکا بھاٹیہ نے چوکے سے اننگ کا آغاز کیا، حالانکہ وہ 17 (20) رنز بنانے کے بعد پویلین لوٹ گئیں۔ یاستیکا کا وکٹ گنوانے کے باوجود ہندوستان نے شیفالی ورما کے جارحانہ انداز کی بنیاد پر پاور پلے میں 43 رنزجوڑ لئے۔ شفالی 24 گیندوں پر چار چوکوں کے ساتھ 33 رنز بناکر اچھی لے میں نظر آرہی تھیں لیکن ناشرا سندھو نے انہیں آؤٹ کرکے ہندوستان کو ایک اور جھٹکا دیا۔
درمیانی اوورز میں اسپنرز نے رن ریٹ پر لگام کسی اورنتیجتاً کپتان ہرمن پریت کور بھی 12 گیندوں پر 16 رنز بنانے کے بعد پویلین لوٹ گئیں۔ہندوستان کو آخری چار اوورز میں 41 رنز درکار تھے، جس کے بعد ریچا-روڈریگس نے اننگ کی رفتار بدل دی۔
دونوں نے ندا ڈار کے 17ویں اوور میں ایک ایک چوکا لگا کر 13 رنز جوڑے، جبکہ ریچا نے اگلے اوور میں ایمن انور کو تین چوکے لگا کر 14 رنز بنائے۔ ہندوستان کو آخری 12 گیندوں پر 14 رنز درکار تھے لیکن روڈریگس نے اپنی نصف سنچری مکمل کر تے ہوئے صرف چھ گیندوں میں ہی ٹیم کو ہدف تک پہنچا دیا۔
اس سے قبل پاکستان نے ٹاس جیت کر بیٹنگ کا فیصلہ کیا لیکن اوپنر جویریہ خان صرف آٹھ رنز بنانے کے بعد دیپتی شرما کا شکار ہو گئیں۔ تیسرے نمبر پر بیٹنگ کرنے والی بسمہ نے کریز پر آتے ہی رنوں کی رفتار بڑھائی لیکن دوسرے سرے پر منیبہ علی (12) اور ندا ڈار (00) کا وکٹ گرنے سے پاکستان کی مشکلات میں اضافہ ہوگیا۔
کسی ہوئی ہندوستانی گیندبازی کے باعث پاکستان 12 اوورز میں صرف 68 رنز ہی بنا سکا۔ سدرہ امین (11) نے دباؤ میں آکر 13ویں اوور کی پہلی گیند پر آؤٹ ہو گئیں۔ تاہم، اس کے بعد، 16 سالہ عائشہ اور معروف کے درمیان شراکت نے میچ کا رخ موڑ دیا۔
عائشہ نے رینوکا سنگھ کو ایک چھکا اور ایک چوکا لگا کر 16ویں اوور میں 18 رنز جوڑے۔ معروف نے بھی 18ویں اوور کی پہلی گیند پر چوکا لگا کر اپنی نصف سنچری مکمل کی۔ اننگ کے 19ویں اوور میں معروف کوایک زندگی بھی ملی، جب رادھا یادیو نے ان کا کیچ چھوڑ دیا۔
عائشہ-معروف کے درمیان پانچویں وکٹ کے لیے 47 گیندوں پر 81 رنوں کی دھماکہ خیز شراکت داری ہوئی، جس نے پاکستان کو 20 اوورز میں 149/4 تک پہنچا دیا۔ یہ پاکستان کا ٹی ٹوئنٹی ورلڈ کپ اور بھارت کے خلاف سب سے زیادہ اسکور ہے۔
رادھا نے ہندوستان کے لیے چار اوور میں صرف 21 رن دے کر دو وکٹ لیے۔ پوجا وستراکر نے چار اوورز میں 30 رن دے کر ایک وکٹ لیا۔ دیپتی شرما کو بھی ایک کامیابی ملی، حالانکہ انہوں نے اپنے چار اوورز میں 39 رن خرچ کئے۔
