ایران نے اسرائیل پر تقریباً 200 ڈرون اور کروز میزائل فائر کر دیے

تہران (یواین آئی) دمشق میں ایرانی قونصل خانے پر اسرائیلی حملے کے جواب میں ایران نے اسرائیل پر تقریباً 200 ڈرون اور کروز میزائل فائر کر دیے۔ ایرانی خبر رساں ادارے ارنا کے مطابق ایران نے اسرائیل پر براہ راست ڈرون حملے کیے، حملے میں اسرائیلی دفاعی تنصیاب اور فوجی ٹھکانوں کو نشانہ بنایا گیا۔ ایرانی میڈیا کے مطابق ایران نے اسرائیل میں 50 فیصد اہداف کو کامیابی سے نشانہ بنایا۔رپورٹس کے مطابق اسرائیل پر حملے میں ان کے اتحادی یمن، لبنان اور عراق بھی شامل ہیں، اسرائیل پر مختلف سمتوں سے حملہ کیا جارہا ہے۔دوسری جانب اسرائیلی فوج کے ترجمان ڈینیئل ہگری نے ان حملوں کی تصدیق کرتے ہوئے کہا ہے کہ ایران کی جانب سے 200 کے قریب ڈرون اور میزائل داغے گئے اور کچھ میزائل حملے عراق اور یمن سے بھی کیے گئے۔ان کا کہنا تھا کہ صرف چند ایرانی میزائل اسرائیل کی سرزمین میں گرے جس سے فوجی اڈے اور انفراسٹرکچر کو صرف معمولی نقصان پہنچا۔اس کے علاوہ ایرانی حملوں کے جواب میں امریکا اور اردن نے اسرائیل کی مدد کرتے ہوئے کئی ایرانی ڈرونز مار گرائے۔دوسری جانب یمن کے حوثی، لبنان کی حزب اللہ کی جانب سے بھی اسرائیل پر حملے کی بھی اطلاعات ہیں۔یاد رہے یکم اپریل کو اسرائیل کے دمشق میں ایرانی قونصل خانے پر حملے کے بعد ایران نے اسرائیل پر جوابی حملے سے خبردار کیا تھا۔یہ پہلا موقع ہے کہ ایران نے حزب اللہ اور حماس سمیت اپنے اتحادیوں کے ساتھ برسوں سے جاری ’پراکسی جنگیں‘ چھیڑنے کے بعد اسرائیل پر براہ راست حملہ کیا ہے۔ایرانی دعووں کے بیچ اسرائیل نے کہا ہے کہ ایران کی جانب سے لانچ کیے گئے 100 سے زیادہ ڈرونز کو پہلے ہی اسرائیل کی فضائی حدود سے باہر روک دیا گیا ہے اسرائیلی ریڈیو گالاٹز نے ایک سیکورٹی ذرائع کے حوالے سے یہ اطلاع دی رپورٹ میں کہا گیا ہے کہ امریکی اور برطانوی افواج نے ان ڈرونز کو روکا۔
اسی درمیان ایران نے اس عزم کا اظہار کیا ہے کہ اگر اسرائیل نے ہفتے کی رات یہودی ریاست کے خلاف شروع کیے گئے حملوں کا جواب دیا تو وہ فوری طور پر دوگنی طاقت سے حملہ کرے گا خبر رساں ادارے تسنیم نے یہ اطلاع دی دمشق میں ایرانی سفارت خانے سے متصل قونصلر انیکسی بلڈنگ پر اسرائیل کے فضائی حملے کے جواب میں ایران کے اسلامک ریولیوشنری گارڈ کارپس نے ہفتے کی رات اسرائیل پر ڈرون اور میزائل حملے کیے تھے۔
ادھراسرائیلی دفاعی افواج (آئی ڈی ایف) نے کہا ہے کہ ایران کی جانب سے ان کے ملک پر حملوں میں جنوبی اسرائیل میں ایک فوجی اڈے پر بنیادی ڈھانچے کو معمولی نقصان پہنچا ہے۔ زمین سے زمین سے مار کرنے والے درجنوں ایرانی میزائلوں کو فضا میں ہی تباہ کر دیا گیا۔آئی ڈی ایف نے سوشل میڈیا پلیٹ فارم ایکس پر ایک بیان میں کہا کہ انہوں نے ایران سے سے داغے گئے میزائلوں کو شناخت کرلیا تھا اور ان میں سے زیادہ تر کو اپنے فضائی دفاعی نظام سے اسرائیلیسرحد میں داخل ہونے سے پہلے ہی تباہ کردیا گیا۔بیان میں کہا گیا ہے کہ اس میں اسرائیل کا ایرو ایئر ڈیفنس سسٹم استعمال کیا گیا اور اسرائیل کے اسٹریٹجک اتحادیوں نے بھی اس کام میں مدد کی۔بیان میں کہا گیا ہے کہ ایران کے کچھ میزائل یقینی طور پر اسرائیل کے بعض مقامات پر گرے ہیں۔ ان میں سے جنوبی اسرائیل میں ایک فوجی اڈہ ہے جہاں بنیادی ڈھانچے کو معمولی نقصان پہنچا ہے۔بیان میں کہا گیا ہے کہ ایران نے کئی اسٹرائیک ہوائی جہاز اور کروز میزائل بھی استعمال کیے، اور آئی ڈی ایف نے ریسکیو آپریشن میں درجنوں جنگی طیارے تعینات کیے ہیں۔آئی ڈی ایف نے کہا ہے کہ اس نے اسرائیل کی سرحدوں کی حفاظت کے لیے سبھی محاذ پر تیاری کر رکھی ہے۔ادھر دوسری جانب اردن نے اسرائیل پر ایرانی ڈرون حملے کے درمیان ملک کے تمام صوبوں میں ہنگامی حالت نافذ کر دی ہے۔ یہ اطلاع اردنی نشریاتی ادارے المملكةنے ایک ذرائع کے حوالے سے دی۔دریں اثنا، ایک خبر رساں ایجنسی نے ذرائع کا حوالہ دیتے ہوئے کہا ہے کہ اردن کی مسلح افواج کو ‘ہائی الرٹ’ پر رکھا گیا ہے، جس میں ایران کی جانب سے ریڈار سسٹم کے ذریعے لانچ کیے جانے والے ڈرونز کی سرگرمیوں کی نگرانی بھی شامل ہے۔
دریں اثناء اسرائیل کے وزیر اعظم بنجمن نیتن یاہو نے کہا کہ ایران کے بڑے ڈرون اور میزائل حملے کو ناکام بنا دیا گیا ہے اور مشترکہ کوششوں کے ذریعہ جیت کا وعدہ بھی کیا ہے۔مسٹر نیتن یاہو نے سوشل میڈیا پلیٹ فارم ‘ایکس’ پر کہا’ ہم نےمداخلت کی، ہم نے روکا، ساتھ مل کر ہم جیتیں گےٗ۔ایران کے اسلامی انقلابی گارڈ کورپس (آئی آر جی سی) نے یکم اپریل کو دمشق میں ایرانی سفارت خانے سے متصل قونصلر انیکس کی عمارت پر اسرائیل کے فضائی حملہ کے جواب میں اسرائیل پر ایک بڑا ڈرون اور میزائل حملہ کیا تھا۔ حملے میں ایک عمارت تباہ ہو گئی اور دو جنرلوں سمیت آئی آر جی سی کے سات ارکان مارے گئے تھے۔ اس کے بعد تہران نے جوابی کارروائی کرنے کا عہد کیا۔نیویارک ٹائمز نے اتوار کے روز دو اسرائیلی حکام کے حوالے سے رپورٹ کیا کہ ایران نے 185 ڈرون، 36 کروز میزائل اور 110 سطح سے سطح پر مار کرنے والے میزائل داغے۔ اسرائیلی میڈیا نے اطلاع دی ہے کہ اسرائیل نے ایران کی طرف سے داغے گئے 99 فیصد ڈرونز اور میزائلوں کو روک لیا ہے اور فیصلہ کن جواب دینے کی تیاری کر رہا ہے۔