کرناٹک ریاستی اسمبلی کے نتائج کا پیغام:ڈاکٹر سید قاسم رسول الیاس

نئی دہلی:ویلفیئر پارٹی آف انڈیا کر ناٹک کے عوام کو مبارکباد دیتی ہے کہ انہوں نے بی جے پی کو شرمناک شکست دے کر اس کی فرقہ وارانہ سیاست، ریاستی خزانہ کی لوٹ کھسوٹ اور عوام کے بنیادی مسائل سے بے نیازی کے رویہ کو پوری طرح مسترد کر دیا۔
ویلفیئر پارٹی آف انڈیا کے قومی صدر ڈاکٹر سید قاسم رسول الیاس نے کہا کہ کانگریس پارٹی اور اس کی مرکزی و ریاستی قیادت قابل مبارکباد ہے کہ اس نے جنوبی ہند کی واحد ریاست کرناٹک سے بی جے پی کے چراغ کو گل کر دیا نیز واضح اکثریت حاصل کر کے ان قیاس آرائیوں کا بھی قلع قمع کر دیا کہ اگر وہ ریاست میں سب سے بڑی پارٹی بن جائے، تب بھی بی جے پی کی جوڑ توڑ کی سیاست کے پیش نظر حکومت بنائے گی یقین سے نہیں کہا جا سکتا۔
انہوں نے کہا کہ کر ناٹک ریاستی اسمبلی کے نتائج دراصل دستور ہند کی سیکولر، جمہوری اقدار پر عوام کے اعتماد اور بی جے پی کی منافرانہ تقسیم پر مبنی سیاست نیز جھوٹ وافتراء پر دازی سے بیزارگی کا عملی مظاہرہ ہے۔
انہوں نے کہا کہ جی جے پی کی شرمناک شکست دراصل ریاستی عوام و وزیر اعظم مودی کی ہندوتو الفاظی پر غم و غصہ کا اظہار ہے جس کا مظاہرہ گزشتہ کئی ماہ کبھی حجاب مخالف تحریک، کبھی مسلم رزرویشن کا خاتمہ اور کبھی ٹیپو سلطان کی توہین کی شکل میں سامنے آرہا تھا، نیز بی جے پی کی ریاستی حکومت کی عوام کے بنیادی مسائل سے یکسر غفلت، ریاست میں امن و سلامتی سے بے نیازی نیز عوام کی فلاح و بہبود سے مکمل کنارہ کشی کا مظاہرہ بھی اس کی دوسری بنیادی وجہ ہے۔
ڈاکٹر الیاس نے کہا کرناٹک ریاستی اسمبلی کے نتائج نے یہ بھی واضح کر دیا کہ پارلیمانی انتخاب(2024) میں بھی بی جے پی کو شکست دی جا سکتی ہے اگر حزب اختلاف کی جماعتوں کے درمیان سیٹوں پر مفاہمت ہو جائے، وہ ملک کی سیکولر جمہوری اقدار سے کو ئی مفاہمت نہ کریں، ہندوتو اور ہندوراشٹر جیسے اشوز پر ان کا موقف واضح ہو اور وہ عوام کی فلاح و بہبود کو اپنی الیکشن مہم کا بنیادی ایجنڈا بنائیں نیز وہ مرکزی حکومت کے دس سالہ دور کی ملک دشمن و عوام دشمن پالیسیوں کو پوری طرح بے نقاب کریں۔