سپریم کورٹ کی سخت پھٹکار کے بعد تمل ناڈو کے گورنرکا رُخ ہوا تبدیل
نئی دہلی(یو این آئی) سپریم کورٹ کے سخت حکم کے ایک دن بعد تمل ناڈو کے گورنر آر این روی نے جمعہ کو سپریم کورٹ کو بتایا کہ دراوڑ منیترا کزگم (ڈی ایم کے) کے ایم ایل اے کے۔ پونموڈی 22 مارچ کو سہ پہر 3.30 بجے وزیر کے طور پر حلف لیں گے۔
چیف جسٹس ڈی وائی چندرچوڑ اور جسٹس جے بی پاردی والا اور منوج مشرا پر مشتمل بنچ کے سامنے پیش ہوئے اٹارنی جنرل آر وینکٹ رمانی نے اس معاملے میں کہا کہ گورنر یہ بتانا چاہتے ہیں کہ ان کا سپریم کورٹ کے حکم کی خلاف ورزی کا کوئی ارادہ نہیں ہے۔
گورنر کے اس بیان کو آن ریکارڈ کرتے ہوئے سپریم کورٹ نے تمل ناڈو حکومت کی طرف سے دائر عبوری درخواست کو نمٹا دیا۔
تمل ناڈو حکومت کی طرف سے پیش ہونے والے سینئر وکلاء مکل روہتگی، اے ایم سنگھوی اور پی ولسن نے عدالت کو بتایا کہ گورنر نے نرم رویہ اپنایا ہے اور پونموڈی کو حلف برداری کے لیے مدعو کیا ہے۔سپریم کورٹ نے تمل ناڈو حکومت کی درخواست پر سماعت کرتے ہوئے گورنر کے اختیار کردہ موقف پر سوال اٹھایا تھا۔بنچ نے کہا تھاکہ”وہ (گورنر) سپریم کورٹ آف انڈیا کی نافرمانی کر رہے ہیں۔ جب سپریم کورٹ آف انڈیا کسی سزا پر روک لگاتی ہے تو گورنر کو کوئی حق نہیں ہے کہ وہ اسے نافذ کرے۔ بنچ نے کہا تھاکہ ’’ہمیں تمل ناڈو کے گورنر کے طرز عمل سے سخت تشویش ہے۔‘‘
عدالت عظمیٰ کی دو رکنی بنچ نے 11 مارچ کو غیر متناسب اثاثہ جات کیس میں مسٹر پونموڈی کو سنائی گئی سزا کو معطل کر دیا تھا۔اس کے بعد وزیر اعلیٰ ایم کے اسٹالن نے 13 مارچ کو گورنر کو خط بھیجا تھا کہ وہ مسٹر پونموڈی کو وزیر کے عہدے کا حلف دلائیں۔17 مارچ کو گورنر نے تاہم جواب دیا کہ مسٹر پونموڈی کی سزا صرف ‘معطل، منسوخ نہیں’ کی گئی ہے اور اس لیے انہیں وزیر کے طور پر مقرر نہیں کیا جا سکتا۔
عدالت عظمیٰ نے 21 مارچ کو تمل ناڈو حکومت کی درخواست پر سماعت کرتے ہوئے گورنر کے اس موقف پر برہمی کا اظہار کیا تھا۔
