مرکزی کابینہ سے بھی استعفیٰ دیں گے اور مدھیہ پردیش کی سیاست میں اپنا کردار نبھائیں گے
نئی دہلی، (یو این آئی) مدھیہ پردیش میں بھارتیہ جنتا پارٹی کی نئی حکومت کی تشکیل سے قبل دموہ پارلیمانی حلقہ کے نمائندے اور مرکزی وزیر پرہلاد سنگھ پٹیل نے بدھ کے روز ایوان زیریں کی رکنیت سے استعفیٰ دینے کا اعلان کیا۔ مسٹر پٹیل نے آج پارلیمنٹ ہاؤس کے احاطے میں نامہ نگاروں کو بتایا کہ انہوں نے وزیر اعظم نریندر مودی اور بھارتیہ جنتا پارٹی کے صدر جے پرکاش نڈا سے آشیرواد حاصل کرنے کے بعد لوک سبھا کی رکنیت سے استعفیٰ دے دیا ہے۔
حالیہ اسمبلی انتخابات میں بی جے پی نے مسٹر پٹیل کو مدھیہ پردیش کی نرسنگھ پور سیٹ سے میدان میں اتارا تھا جہاں انہوں نے اکتیس ہزار سے زیادہ ووٹوں کے فرق سے کامیابی حاصل کی تھی۔ انہوں نے بتایا کہ وہ کابینہ سے بھی استعفیٰ دینے جا رہے ہیں۔ مدھیہ پردیش میں اسمبلی انتخابات میں بھارتیہ جنتا پارٹی کی کامیابی کے بعد نئی حکومت کی تشکیل میں انہیں ذمہ داری ملنے کے چرچے کے درمیان، انہوں نے نامہ نگاروں سے کہا کہ وہ بھوپال جا رہے ہیں۔ مسٹر پٹیل کو مودی حکومت میں فوڈ پروسیسنگ انڈسٹری اور جل شکتی کی وزارتوں میں وزیر مملکت کی ذمہ داری دی گئی تھی۔ مسٹر پٹیل مدھیہ پردیش میں پارٹی کے سینئر لیڈر ہیں۔ وہ واجپئی کی حکومت میں کوئلہ کے وزیر مملکت تھے۔
بھارتیہ جنتا پارٹی مدھیہ پردیش میں مسلسل پانچویں بار حکومت بنانے جا رہی ہے۔ پارٹی نے ابھی تک مقننہ پارٹی کے سربراہ کا انتخاب نہیں کیا ہے۔ مدھیہ پردیش میں نومبر میں ہونے والے اسمبلی انتخابات میں پارٹی نے کسی کو وزیر اعلیٰ کا امیدوار اعلان نہیں کیا۔ موجودہ وزیر اعلیٰ شیوراج سنگھ چوہان نے کہا ہے کہ وہ پارٹی کے کارکن ہیں اور پارٹی انہیں جو بھی ذمہ داری دے گی اسے وہ پورا کریں گے۔
