امریکی بحریہ کی سربراہی خاتون ایڈمرل کے سپرد کرنے کی تیاری

واشنگٹن: صدرِ امریکہ جو بائیڈن نے اعلان کیا ہے کہ وہ خاتون ایڈمرل لیزا فرینچیٹی کو امریکی بحریہ کی سربراہی کیلئے نامزد کریں گے۔ ٓپ کو بتادیں کہ اس نامزدگی کے بعد ایڈمرل لیزا فرینچیٹی امریکی تاریخ میں پہلی خاتون ہوں گی جو بحریہ کی کمان کریں گی اور جوائنٹ چیفس آف اسٹاف میں خدمات سرانجام دیں گی۔ ذہن نشیں رہے کہ فرینچیٹی یورپ اور افریقہ میں امریکی بحریہ کی ڈپٹی کمانڈر رہ چکی ہیں، وہ ستمبر 2022 میں وائس چیف آف نیول آپریشنز بنی تھیں۔ بحریہ کے موجودہ سربراہ ایڈمرل مائیک گلڈے کی چار سالہ مدت اگلے مہینے مکمل ہوجائے گی۔
بائیڈن نے اپنے بیان میں کہا کہ فرینچیٹی ہماری قوم کیلئے بطور کمیشنڈ افسر 38 سال سے خدمات سرانجام دے رہی ہیں، اس وقت وہ وائس چیف آف نیول آپریشنز ہیں۔ انہوں نے یہ بھی کہا کہ فرینچیٹی دوسری خاتون ہوں گی جنہیں امریکی بحریہ میں فور اسٹار ایڈمرل کا رینک ملے گا اور اگر اس کی توثیق ہوگئی تو وہ پہلی خاتون ہوں گی جو چیف آف نیول آپریشنز بنیں گی اور جوائنٹ چیفس آف اسٹاف میں کام کریں گی۔
حالانکہ ابھی یہ واضح نہیں ہے کہ سینیٹ بھی ان کی نامزدگی کی توثیق کرے گی یا نہیں کیونکہ ریپبلکن پارٹی سے تعلق رکھنے والے ایک قانون ساز نے 200 سینئر عسکری نامزدگیاں روک رکھی ہیں۔