راج ناتھ مسلح افواج کے سابق فوجیوں کے دن کی تقریبات کی صدارت کریں گے

نئی دہلی، 13 جنوری (یو این آئی) وزیر دفاع راج ناتھ سنگھ اتوار کو کانپور ایئر فورس اسٹیشن پر سابق فوجیوں کی ایک ریلی کے ساتھ آٹھویں مسلح افواج کے سابق فوجی دن کی ملک گیر تقریبات کی صدارت کریں گے۔
مسٹر سنگھ جنگی یادگار پر ملک کے جنگجوؤں کو ان کی اعلیٰ قربانی اور سرشار خدمات کے لیے خراج عقیدت بھی پیش کریں گے۔
وزارت دفاع کے مطابق، اس سال یہ تقریب ملک بھر میں 10 مقامات سری نگر، پٹھانکوٹ، دہلی، کانپور، الور، جودھ پور، گوہاٹی، ممبئی، سکندرآباد اور کوچی پر تینوں خدمات کے ذریعہ منائی جارہی ہے۔ وزیر مملکت برائے دفاع اجے بھٹ سکندرآباد میں پروگرام کی صدارت کریں گے۔ دہلی میں ہونے والا یہ پروگرام مانیک شا سینٹر میں منعقد ہوگا اور اس میں فضائیہ کے سربراہ اور بحریہ کے سربراہ شرکت کریں گے۔
تمام ریاستوں کے وزرائے اعلیٰ اور لیفٹیننٹ گورنرز سے درخواست کی گئی ہے کہ وہ اپنی اپنی ریاستوں میں اس دن کو منائیں۔ پروگرام کے دوران مختلف شخصیات کو میڈلز، یادگاری اور شناختی اسناد وغیرہ سے نوازا جائے گا۔ تقریب کے ایک حصے کے طور پر سابق فوجیوں کے لیے ایک گانا ’وی فار ویٹرنز‘ بھی بجایا جائے گا۔
مسلح افواج کے سابق فوجیوں کا دن ہر سال 14 جنوری کو منایا جاتا ہے کیونکہ 1947 کی جنگ میں فوج کو فتح سے ہمکنار کرانے والے ہندوستانی فوج کے پہلے کمانڈر انچیف فیلڈ مارشل کے ایم کریپا 1953 میں اسی دن ریٹائر ہوئے تھے۔ یہ دن پہلی بار 2016 میں منایا گیا تھا اور اس کے بعد سے ہر سال سابق فوجیوں کے اعزاز میں اس طرح کی تقریبات منعقد کرکے منایا جاتا ہے۔