ٹونک کی معروف شخصیت صاحبزادہ شوکت علی خاں کا انتقال

ٹونک،(یواین آئی) عربک اینڈ پرشین انسٹی ٹیوٹ راجستھان ٹونک کے بانی ڈائریکٹر صاحبزادہ شوکت علی خان طویل علالت کے بعد گزشتہ رات جے پور کے ایک اسپتال میں انتقال کرگئے۔ ان کی عمر 85 برس تھی۔وہ عربی فارسی اور اردوزبان کے جید عالم تھے۔
انھوں نے اپنی بہترین صلاحیتوں کو بروئے کار لاکر ٹونک کے عربک اینڈ پرشین انسٹی ٹیوٹ کو بین الاقوامی توجہ کا مرکز بنایا۔ اس ادارے کا آغاز انھوں نے ٹونک کی سعیدیہ ڈسٹرکٹ لائبریری کے زینے کے نیچے ایک چھوٹی سی جگہ پر ادارہ علوم شرقیہ کے نام سے کیا تھا جو ان کی بے پایاں کوششوں کے نتیجے میں آج بین الاقوامی سطح کا انسٹی ٹیوٹ ہے۔
انھوں نے متعدد عربی اور فارسی کتب کا اردو میں ترجمہ کیا۔ وہ ایک علم دوست اور ادب نواز شخصیت تھے۔ انھیں فن خطاطی سے خاص شغف تھا۔ صاحبزادہ شوکت علی خاں کی اہم تصانیف میں ” اسلامی ہند میں فن خطاطی: امتیازات و خصوصیات ” اور ” قصر علم ٹونک کے کتب خانے اور ان کے نوادرات ” خاص طور پر قابل ذکر ہیں۔