ہرنئی / 28 اپریل (یو این آئی ) نیشنلسٹ کانگریس پارٹی (این سی پی) کے ریاستی صدر اور رائے گڑھ لوک سبھا حلقہ سے امیدوار ایم پی سنیل تٹکرے نے پاج پنڈھری کے لوگوں سے آئندہ لوک سبھا انتخابات میں حمایت کرنے اور بھرپور اکثریت میں ووٹ دینےکی اپیل کی۔انہوں نے جلسۂ عام سے خطاب کرتے ہوئے کہا کہ یہ انتخاب ملک کو ایک نئی یا سمت دینے والا ہے، اس لیے ملک کی ترقی و خوشحالی کے لیے آپ لوگ ہمیں بھرپور اکثریت کے ساتھ ووٹ دیں۔جلسۂ عام سے خطاب کرتے ہوئے سنیل تٹکرے نے کہا کہ پچھلے انتخابات میں شری وردھن سے مجھے کم ووٹ ملے تھے لیکن اس بار مجھے سب سے زیادہ ووٹ حاصل ہوں گے۔ تٹکرے نے کہا کہ ادھو ٹھاکرے نے کانگریس کے ساتھ اتحاد کیا ہے، یہ ٹھیک ہے لیکن اگر ہم نے بی جے پی کے ساتھ اتحاد کیا ہے تو ہم پر سوالیہ نشان کھڑا کیا جاتا ہے۔
سنیل تٹکرے نے مزید کہا ادھو ٹھاکرے ہمارے خلاف جو کچھ کہہ رہے ہیں وہ سب بے بنیاد ہے۔ انہوں نے بالا صاحب ٹھاکرے کے نظریات کو پامال کیا ہے، انہیں بولنے کا کوئی اخلاقی حق نہیں ہے۔سنیل تٹکرے نے کہا کہ ممبئی کے سسون ڈاک کو ایک اہم مرکز سمجھا جاتا ہے۔ اسی طرح پاج پنڈھری کے ہرنئی میں بندر گاہ کی تعمیر کی جائے گی۔ ہرنئی کے بندرگاہ کے لیے 205 کروڑ روپے کی منظوری دی گئی ہے۔ ہرنئی بندر گاہ کی تعمیر سے یہاں سے بین الاقوامی کاروبار کرنا ممکن ہوگا۔ مستقبل کو مدنظر رکھتے ہوئے اس بندر گاہ کے لیے فنڈز مل چکے ہیں۔ اس علاقے میں میرین پارک اور فوڈ پارک بنانے کا فیصلہ کیا گیا ہے اور یہ پارک 180 سرکاری جگہوں میں سے 160 ایکڑ میں پر تعمیر کیا جائے گا۔ اس کے علاوہ ایم ایل اے یوگیش کدم نے یقین دلایا کہ وہ ماہی گیری کے معاملے میں ایک صنعت قائم کرنے کی کوشش کریں گے۔
