ترکیہ میں دو سڑک حادثے،32کی موت

انقرہ (ایجنسیاں)ترکیہ کے جنوب مشرق میں ٹریفک حادثہ پیش آیا ہے جس کے نتیجے میں 32 افراد جاں بحق ہوگئے، مرنے والوں میں فائر فائٹرز، ہیلتھ اسٹاف بھی شامل ہیں۔غیر ملکی خبر رساں ایجنسی کے مطابق غازیانتپ کے ہائی وے پر ایک بس حادثہ ہوا جہاں امدادی کارروائیاں جاری تھیں۔اسی اثنا میں پیچھے سے آنے والی مسافر بس جائے وقوعہ پر ریسکیو کارروائیوں میں مصروف عملے اور زخمی مسافروں پر چڑھ دوڑی۔مرنے والوں میں تین فائر فائٹرز، چار ہیلتھ ورکرز اور ترک نیوز ایجنسی کے دو ڈرون آپریٹرز شامل ہیں۔صبح 10 بج کر 45 منٹ پر ایک مسافر بس ہائی وے پر حادثے کا شکار ہوئی۔فائر بریگیڈ، میڈیکل ٹیمز اور ریسکیو اہلکار امدادی کارروائیوں میں مصروف تھے کہ اسی دوران پیچھے سے آنے والی مسافر بس بھی الٹ گئی۔دوسری بس پہلے حادثے کی جائے وقوعہ تک پھسلتے ہوئے آگئی جس کی وجہ سے ریسکیو اہلکار اور ہائی وے پر موجود زخمی مسافر ہلاک ہوئے۔
خبروں کے مطابق دونوں حادثے ایک ہی مقام پر ہوئے۔ العربیہ کی رپورٹ کے مطابق ترکی کےجنوب مشرقی صوبہ غازیان تیپ سے تعلق رکھنے والے علاقائی گورنر داؤد گل نے تصدیق کی ہے کہ یہ دونوں حادثات ایک ہی جگہ پیش آئے ہیں اورپہلے حادثے کی جگہ پرامدادی سرگرمیوں میں مصروف ایمرجنسی کارکنوں اورصحافیوں پرایک بس چڑھ دوڑی ہے جس سے صحافیوں سمیت سولہ افراد ہلاک ہو گئے ہیں۔
انھوں نے بتایا کہ اس حادثے میں مزید بیس افراد زخمی ہوئے ہیں اورانھیں اسپتال منتقل کردیا گیا ہے۔ گل نے جائے حادثہ پربات کرتے ہوئے کہا کہ ہفتہ کی صبح قریباً 10 بج کر45 منٹ پرغازیان تیپ کے مشرق میں ایک سڑک پرمسافر بس لوگوں سے جا ٹکرائی۔
اس کے کچھ دیر بعدجب فائر بریگیڈ، طبی ٹیمیں اور دیگر رضاکار جائے حادثہ پر زخمیوں کو نکال رہے تھے تو ایک اور بس 200 میٹر پیچھے حادثے کا شکارہوگئی اور بریک فیل ہوجانے پر جائے حادثہ پر موجود لوگوں پر چڑھ گئی۔
ٹیلی ویژن کی فوٹیج کے مطابق ایک ٹرک ماردین کے علاقے ڈیرک کے مشرق میں قریباً 250 کلومیٹر (155 میل) کے فاصلے پر جائے حادثہ پر موجود لوگوں پر چڑھ دوڑا۔وہاں امدادی کارکنان جائے حادثہ پر امدادی سرگرمیوں میں مصروف تھے۔
ترکی کے وزیرصحت فخرالدین کوکا کے مطابق ماردین میں پیش آنے والے دوسرے حادثہ میں سولہ افراد ہلاک اور 29 زخمی ہو گئے۔کوکا نے مزیدبتایا کہ زخمیوں میں آٹھ کی حالت تشویش ناک ہے۔
وزیرصحت نے قبل ازیں ٹویٹر پربتایا کہ یہ واقعہ ملک کے جنوب مشرق میں واقع قصبے ڈیرک میں پیش آیا ہے جہاں ٹرک ڈرائیورنے لاری کے بریک فیل ہوجانے کے بعد سڑک پرموجود ہجوم کوکچل دیا۔