ایل پی جی سلنڈر کی قیمت میں 100 روپے کی کمی کا اعلان

نئی دہلی(یو این آئی) وزیر اعظم نریندر مودی نے آج عالمی یوم خواتین کے موقع پر ایل پی جی سلنڈر کی قیمتوں میں 100 روپے کی کمی کا اعلان کرتے ہوئے کہا کہ اس سے ملک بھر کے لاکھوں خاندانوں پر مالی بوجھ کافی کم ہوجائے گا، ، خاص طور پر خواتین کو اس سے فائدہ ہو گا۔ وزیر اعظم کے اس اعلان کو پارلیمانی الیکشن سے جوڑ کر دیکھتے ہوئے اپوزیشن نے اس کی ٹائمنگ پر انگلی اٹھائی ہے۔ بہر حال مسٹر مودی نے سوشل میڈیا ایکس پر اپنی پوسٹ میں لکھا’’آج یوم خواتین پر ہماری حکومت نے ایل پی جی سلنڈر کی قیمتوں میں 100 روپے کی کمی کا فیصلہ کیا ہے۔ اس سے ملک بھر کے لاکھوں خاندانوں پر مالی بوجھ میں نمایاں کمی آئے گی، خاص طور پر ہماری خواتین اس سے مستفید ہوگی۔‘‘
انہوں نے مزید کہا ’’ایل پی جی کو زیادہ کفایتی بنا کر ہمارا مقصد خاندانوں کی فلاح و بہبود اور صحت مند ماحول کو یقینی بنانا ہے۔ یہ خواتین کو بااختیار بنانے اور ان کے لیے ’زندگی میں آسانی‘ کو یقینی بنانے کے ہمارے عزم کے مطابق ہے۔اس سے ایک دن قبل جمعرات کو مرکزی حکومت نے اگلے مالی سال کے لیے اجولا اسکیم کے تحت غریب خواتین کو دی جانے والی سبسڈی میں 300 روپے فی ایل پی جی سلنڈر بڑھانے کا اعلان کیا۔ پچھلے سال اکتوبر میں، حکومت نے ہر سال 12 ری فل تک 14.2 کلوگرام سلنڈر پر سبسڈی 200 روپے سے بڑھا کر 300 روپے فی ری فل کر دی تھی۔
ادھروزیر اعظم نریندر مودی کی جانب سے یوم خواتین کے موقع پر گیس سلنڈر کی قیمتوں میں 100 روپے کی کمی کرنے پر مدھیہ پردیش کے وزیر اعلیٰ ڈاکٹر موہن یادو نے کہا کہ مسٹرمودی نے گیس سلنڈر کی قیمتوں میں کمی کر کے صرف خواتین کو ہی نہیں بلکہ پورے خاندان کو خوشیوں کا تحفہ دیا ہے۔
ڈاکٹر یادو نے سوشل میڈیا پر پوسٹ کیا کہ خواتین کو بااختیار بنانے کے لیے پرعزم وزیر اعظم نریندر مودی نے ہمیشہ پرعزم جذبے کے ساتھ خواتین کی زندگی کو خوشگوار، آرام دہ اور باعزت بنانے کی کوششیں کی ہیں۔خواتین کے عالمی دن پر وزیراعظم کی جانب سے خواتین کو سستے گیس سلنڈر کا تحفہ نہ صرف خواتین بلکہ پورے خاندان کے لیے خوشی کی سوغات ہے۔ انہوں نے کہا کہ مدھیہ پردیش کے کروڑوں خاندانوں کی طرف سے وہ وزیر اعظم کو تہہ دل سے مبارکباد پیش کرتے ہیں۔دریں اثنا وزیر اعلیٰ یوگی آدتیہ ناتھ نے ایل پی جی کی قیمتوں میں 100 روپے کی رعایت دینے کے فیصلے پر ریاست کے عوام کی جانب سے وزیر اعظم نریندر مودی کا شکریہ ادا کیا ہے۔وزیراعلیٰ یوگی نے اپنے ایکس ہینڈل پر لکھا کہ آج خواتین کے عالمی دن کے موقع پر ایل پی جی سلنڈروں کی قیمتوں میں 100 روپئے کی چھوٹ دینے کا فیصلہ، کروڑوں خاندانوں کو مالی راحت دینے کے ساتھ ہی ماتر شکتی کو دھوئیں اور آلودگی سے آزادی دلاکر صحت مند اور خوشگوار زندگی فراہم کرے گا۔مسٹر یوگی نے اس فیصلے کو ماترشکتی کا احترام اور ماحولیات کو تحفظ فراہم کرنے والی عوامی فلاحی سوغات قرار دیا۔