نئی دہلی (یو این آئی) دہلی میونسپل کارپوریشن کے 250 وارڈوں میں دوپہر 2 بجے تک تقریباً 30 فیصد پولنگ ریکارڈ کی گئی۔ریاستی الیکشن کمیشن سے موصولہ اطلاع کے مطابق دوپہر 2 بجے تک تقریباً 30 فیصد پولنگ ریکارڈ کی گئی۔ کسی بھی علاقے سے کسی ناخوشگوار واقعے کی اطلاع نہیں ملی۔پولنگ صبح 8 بجے شروع ہوئی جو شام 5:30 بجے تک جاری رہے گی۔ووٹوں کی گنتی 7 دسمبر کو ہوگی۔ریاستی الیکشن کمیشن کے اعداد و شمار کے مطابق دہلی میں ووٹروں کی کل تعداد 1,45,05,358 ہے۔ دہلی میونسپل کارپوریشن اس سال کے شروع میں شمالی، جنوبی اور مشرقی دہلی میونسپل کارپوریشنوں کو ملا کر حد بندی کے بعد تشکیل دی گئی تھی۔ اس کے بعد یہ پہلا الیکشن ہے۔
ادھر ایم سی ڈی الیکشن کے دوران بھارتیہ جنتا پارٹی کے لیڈر ہرش وردھن، پرویش ورما، دہلی کے وزیر اعلی اروند کیجریوال، عام آدمی پارٹی (آپ) کے وزیر گوپال رائے، کانگریس لیڈر اجے ماکن، الکا لامبا اور کئی سیاسی لیڈروں نے اتوار کو دہلی میونسپل کارپوریشن (ایم سی ڈی) کے انتخابات کے لیے ووٹ دیا تمام رہنماؤں نے عوام سے زیادہ سے زیادہ ووٹ ڈالنے کی اپیل کی ہے اپنا ووٹ ڈالنے کے بعد ڈاکٹر ہرش وردھن نے صحافیوں کو بتایا کہ انہیں یقین ہے کہ بڑی تعداد میں لوگ دہلی سے ووٹ ڈالیں گے۔ انہوں نے کہا ’’وزیراعظم نریندر مودی کی قیادت میں بی جے پی نے ملک کو نئی بلندیوں پر پہنچایا ہے اور دہلی نے بھی گزشتہ 15 سالوں میں بی جے پی کا کام دیکھا ہے۔‘‘
لوک سبھا میں مغربی دہلی سے ایم پی پرویش ورما نے کہا ’’کووڈ کے دوران آپ لوگوں کے لیے کام کرتے نظر نہیں آئی، صرف ایم سی ڈی کارکن ہی لوگوں کے ساتھ کھڑے تھے، اس لیے ایم سی ڈی انتخابات میں بی جے پی کو 250 میں سے تقریباً 210 سیٹیں حاصل ہورہی ہیں‘‘۔
کانگریس لیڈر نے کہا ’’کانگریس کے امیدوار اچھے ہیں اور لوگوں کو اس امیدوار کو ووٹ دینا چاہئے جو انتخابات کے بعد ان کے لئے دستیاب ہوگا‘‘۔
دریں اثنا، دہلی کے وزیر اعلی اروند کیجریوال اور نائب وزیر اعلی منیش سسودیا نے اپنا ووٹ ڈالا ہے اور دہلی والوں سے بدعنوانی سے پاک حکومت کے لیے ووٹ دینے کی اپیل بھی کی ہے۔
مسٹر کیجریوال نے ٹویٹ کرکے لوگوں سے ایم سی ڈی میں ایماندار حکومت کو ووٹ دینے کی اپیل کی۔ انہوں نے کہا کہ ایک ایماندار پارٹی کو ووٹ دیں، اچھے لوگوں کو ووٹ دیں۔ بدعنوانی، غنڈہ گردی اور زیادتی کرنے والوں کو ووٹ نہ دیں۔ دہلی کو گندا کرنے والوں کو ووٹ نہ دیں۔ ان لوگوں کو ووٹ دیں جو دہلی کو چمکدار اور صاف بنائیں۔ کام کرنے والوں کو ووٹ دیں۔ ان لوگوں کو ووٹ نہ دیں جو کام کرنا بند کردیتے ہیں۔
نائب وزیر اعلیٰ منیش سسودیا نے کہا کہ بھارتیہ جنتا پارٹی (بی جے پی) نے 15 سال تک دہلی کے لیے کچھ نہیں کیا، عوام کے لیے کام کرنے میں بری طرح ناکام رہی۔دہلی میونسپل کارپوریشن کے 250 وارڈوں کے لیے ووٹنگ جاری ہے اور یہ شام 5.30 بجے ختم ہوگی۔ ووٹوں کی گنتی بدھ کو ہوگی۔ 250 وارڈوں میں سے 104 وارڈ خواتین کے لیے مختص ہیں۔ ایم سی ڈی انتخابات کے لیے کل 1,349 امیدوار میدان میں ہیں جن میں 709 خواتین اور 640 مرد شامل ہیں۔
بی جے پی اور آپ دونوں نے اس الیکشن میں 250 امیدوار کھڑے کیے ہیں، جب کہ کانگریس 247 سیٹوں پر الیکشن لڑ رہی ہے۔
دہلی ریاستی الیکشن کمیشن نے آزادانہ اور منصفانہ انتخابات کو یقینی بنانے کے لیے وسیع انتظامات کیے ہیں۔ قومی راجدھانی میں تقریباً 13,600 پولنگ اسٹیشن بنائے گئے ہیں۔ جن میں سے تین ہزار سے زائد کی شناخت حساس کی گئی ہے۔ کل پولنگ اسٹیشنز میں سے 68 ماڈل پولنگ اسٹیشنز اور اتنے ہی پنک پولنگ اسٹیشنز بنائے گئے ہیں جنہیں مکمل طور پر خواتین عملہ چلا رہا ہے۔دہلی پولیس کے تقریباً 40,000 اہلکار، 20,000 ہوم گارڈز اور نیم فوجی اور ریاستی مسلح پولیس دستوں کی 108 کمپنیاں محفوظ ماحول کو یقینی بنانے کے لیے تعینات کی گئی ہیں۔
