گڈ کری نے سرنگ میں پھنسے مزدوروں کو بحفاظت نکالنے کے کاموں کا جائزہ لیا

سلکیارا/اترکاشی (یو این آئی) مرکزی سڑک ٹرانسپورٹ اور شاہراہوں کے وزیر نتن جے رام گڈکری نے اتوار کو اتراکھنڈ کے اترکاشی ضلع کی سلکیارا ٹنل کا جائے وقوعہ معائنہ کیا اور اس میں پھنسے مزدوروں کو نکالنے کے لیے چلائے جارہے بچاؤ آپریشن کا جائزہ لیا۔اس دوران مسٹرگڈکری نے کہا کہ ملک اور دنیا میں دستیاب بہترین ماہرین سے فائدہ اٹھا کر سرنگ میں پھنسے لوگوں کو نکالنے کی ہر ممکن کوشش کی جائے گی۔ انہوں نے ریسکیو آپریشن میں مصروف اداروں اور اہلکاروں کو زیادہ سے زیادہ تیاری کرنے اور ضروری وسائل کے بروقت مکمل انتظامات کرنے کی ہدایت کرتے ہوئے کہا کہ ریسکیو کے ہر آپشن پر انتہائی مستعدی اورجلد ازجلد کام کیاجائے۔
مسٹرگڈکری نے ریاست کے وزیر اعلیٰ پشکر سنگھ دھامی کے ساتھ سلکیارا کا دورہ کیا، سرنگ کے اندر جاکر جائے حادثہ کا جائزہ لیا اور ٹنل پروجیکٹ اور بچاؤ آپریشن میں شامل لوگوں سے اس حادثے اور بچاؤ آپریشن کے بارے میں معلومات لی۔ انہوں نے ٹنل میں پھنسے مزدوروں کے اہل خانہ سے بھی ملاقات کی اور یقین دلایا کہ حکومت پوری قوت اور شدت کے ساتھ ریسکیو آپریشن میں مصروف ہے۔ ریسکیو آپریشن کے ابتدائی مرحلے میں درپیش مشکلات کے پیش نظر اب تمام ممکنہ آپشنز پر بیک وقت کام شروع کر دیا گیا ہے۔ انہوں نے کہا کہ مزدوروں کی جان بچانا حکومت کی اولین ترجیح ہے، کسی بھی بہتر امکانات والے آپشن کے لئے کوئی بھی قمیت ادا کرنی پڑے حکومت ادا کرے گی۔
مسٹرگڈکری اور دھامی نے اہل خانہ کو یقین دلایا کہ مرکزی اور ریاستی حکومتیں کارکنوں کو بحفاظت باہر نکالنے میں کوئی کسر نہیں چھوڑیں گی۔
یواین آئی۔الف الف