صدرجمہوریہ نے ‘نئے ہندوستان کے لیے نئی تعلیم’ مہم کا آغاز کیا

بھوونیشور(یو این آئی) صدر جمہوریہ دروپدی مرمو نے اوڈیشہ کے سمبل پور میں واقع برہما کماری ایشوریہ ودیالیہہ سے ایک تعلیمی مہم ‘نئے ہندوستان کے لیے نئی تعلیم’ کا آغاز کیا۔ اس مہم کا مقصد انسانی اقدار کو فروغ دینا اور بہتر معاشرے کے لیے طلبہ کے شعور کو بڑھانا ہے۔اس موقع پر ایک تقریب کو خطاب کرتے ہوئے صدر نے کہا کہ تعلیم نے معاشرے کی تعمیر میں ہمیشہ اہم اور گرانقدر کردار ادا کیا ہے۔ انہوں نے اس بات پر روشنی ڈالی کہ خدمت، مساوات اور ہمدردی جیسی اخلاقی اور انسانی اقدار ہماری ثقافت کی بنیاد ہیں اس لئے نوجوانوں کو ان عظیم نظریات سے واقف ہونا چاہیے۔ انہیں ایک بہتر معاشرہ بنانے کے لیے اپنے بزرگ والدین اور معاشرے کے محروم طبقے کے لوگوں کا خیال رکھنا چاہیے۔ انہوں نے مزید کہا کہ تعلیم کے ذریعے بچوں کے ذہنوں میں ان اقدار کے تئیں مثبت رویہ پیدا کیا جانا چاہیے۔
صدرجمہوریہ نے کہا کہ اخلاقی تعلیم سے ہماری زندگی کی تعمیر میں مدد ملتی ہے اور معاشرے میں مثبت تبدیلیاں آتی ہیں۔ اخلاقی تعلیم ہمیں ہمدردی، مہربانی، دوستی اور بھائی چارے کی زندگی کی اقدار سے آگاہ کرتی ہے۔ ان خصوصیات کے حامل افراد میں مثبت تبدیلیاں آ سکتی ہیں۔ ایک فرد میں مثبت تبدیلیوں کے نتیجے میں ایک بہتر معاشرہ بن سکتا ہے۔انہیں یہ جان کر خوشی ہوئی کہ پرجاپیتا برہما کماری ایشوریہ وشو ودیالیہ خوشی، امن اور مسرت کا راستہ بنا رہی ہے اور یہ ادارہ کردار سازی، خود شناسی کی شاندار رہنمائی کرتی ہے۔