بی جے پی کے ریپسٹ ایم ایل اے کو 25 سال قید

سون بھدر، 15 دسمبر (یو این آئی) اتر پردیش میں ضلع سون بھدرکے دودھی (محفوظ) سے بھارتیہ جنتا پارٹی کے ایم ایل اے رام دلار گونڈ کو نابالغہ لڑکی کی عصمت دری کے نو سال پرانے کیس میں ایڈیشنل ڈسٹرکٹ جج، فرسٹ (ایم پی/ایم ایل اے) جسٹس احسان اللہ خان نے جمعہ کے روز 25 سال قید بامشقت اور متاثرہ کی بازآبادکاری کے واسطے 10 لاکھ روپے جرمانے کی سزا سنائی۔
عدالت کے حکم کے مطابق جرمانے کی پوری رقم عدالت میں جمع ہونے کے بعد متاثرہ کو دی جائے گی۔ عدالت کے فیصلے کے بعد بی جے پی کے ملزم رکن اسمبلی کی قانون ساز اسمبلی کی رکنیت بھی خطرے میں پڑ گئی ہے۔عدالت کی جانب سے جمعہ کے روز سزا سنانے سے قبل ایم ایل اے رام دولار گونڈ کے وکیل نے سزا پر بحث کے دوران رحم کی درخواست کرتے ہوئے کم سے کم سزا دینے کی درخواست کی تھی اور ساتھ ہی عدالت کو یقین دلایا کہ ملزم کی طرف سے متاثرہ کے خاندان کا مکمل خیال رکھا جائے گا۔
اسپیشل پبلک پراسکیوٹر (POCSO) ستیہ پرکاش ترپاٹھی نے کہا کہ 12 دسمبر کو سماعت کے دوران عدالت نے رام دلار کو قصوروار قرار دیا تھا اور اسی دن سزا کے تعین کے لیے 15 دسمبر کی تاریخ مقرر کی تھی۔
یہ معاملہ 4 نومبر 2014 کا ہے جب مسٹر گونڈ ایم ایل اے نہیں تھے اور ان کی بیوی گاؤں کی پردھان تھی، اسی وقت متاثرہ کے بھائی نے میئر پور تھانے میں ایف آئی آر درج کرائی تھی جس میں اس نے رام دلار گونڈ پر الزام لگایا تھا کہ ان کے ذریعہ گزشتہ ایک سال سے اپنی نابالغہ بہن کو دھمکی دے کر عصمت دری کی جارہی ہے، جس کے بعد پولس نے تعزیرات ہند کی دفعہ 376، 506 اور 5L/6 پاکسو ایکٹ کے تحت مقدمہ درج کیا اور تفتیش کے بعد عدالت میں چارج شیٹ داخل کی۔ کیس میں عدالت نے 8 دسمبر کو فریقین کے وکلاء کے دلائل سنے اور 12 دسمبر کو ملزم کو مجرم قرار دیا۔