رام کے نام پر سیاست نہیں ہونی چاہئے:یوگی

لکھنؤ:(یواین آئی) اترپردیش کے وزیر اعلی یوگی آدتیہ ناتھ نے ہفتہ کو کہا کہ بھگوان رام ہمارے آئیڈیل ہیں اور ان کے نام پر کوئی سیاست نہیں ہونی چاہیے۔بجٹ سیشن سے خطاب کرتے ہوئے انہوں نے الزام لگایا کہ یہاں مختلف شعبوں کو نظر انداز کیا گیا تھا۔ ان میں سے اترپردیش میں امکانات والا سروس سیکٹر بھی تھا۔ اسپریچول ٹورزم میں جو امکانات اترپردیش میں تھے گذشتہ سرکاروں نے اس کو نظر انداز کیا۔
وزیر اعلیٰ نے کہا کہ اپوزیشن جماعتوں کے لیڈر کہہ رہے ہیں کہ رام کے نام پر سیاست نہیں کرنی چاہیے۔ ہم نے کبھی سیاست نہیں کی۔ رام ہمارے آئیڈیل ہیں۔ آرادھیا کے نام پر کیسی سیاست؟ ہم انہیں یاد کرتے ہیں۔ رام کے بغیر کوئی کام نہیں ہو سکتا۔ جاگتے ، سوتے ، روتے ، ہر شعبے میں رام رام کاذکر ہوتا ہے۔لیکن ایودھیا نہ جائیں کیونکہ ووٹ بینک متاثر ہوگا۔ آپ ووٹ بینک کی سیاست کر رہے ہیں، ہم نہیں۔ مندر بننے سے پہلے بھی جب عدالت کا فیصلہ نہیں آیا تھا، ہم ایودھیا گئے تھے اور روشنیوں کے ایک عظیم الشان میلے کا اہتمام کیا تھا۔ آج بھی جا رہے ہیں اور آگے بھی جائیں گے۔ اس میں کوئی شک نہیں ہونا چاہیے۔
انہوں نے کہا کہ حکومت نے بجٹ میں اجودھیا، کاشی، متھرا-ورنداون، بارسانہ، گوکل، گووردھن، نیمیشرنیا، وندھیا واسینی دھام، دیوی پاٹن دھام، ناتھ کوریڈور (بریلی)، چترکوٹ کے لیے فنڈز کا انتظام کیا ہے۔ چیف منسٹر ٹورازم پروموشن اسکیم کے تحت ہم نے بجٹ میں ہر اسمبلی حلقہ میں ایک مذہبی مقام کو ترقی دینے کے لیے فنڈز کا انتظام کیا ہے۔ پریاگ راج 2025 میں کمبھ کا اہتمام 2019 سے بہتر کر سکیں۔ اس کے لیے بجٹ میں ایک بار پھر فنڈز کا انتظام کیا گیا ہے۔
یوگی نے ایس پی کی سابقہ حکومت کو گھیرتے ہوئے کہا’آپ تومتھرا-ورنداون کے لیے بھی کچھ نہیں کر سکے۔آپ وہاں جانے سے بھی ڈرتے تھے۔ ہم نے دونوں جگہوں پر تالے کھولے (کاشی میں ایس پی حکومت نے تالا لگا دیا تھا اور متھرا میں آپ لوگوں نے جنم بھومی کے پیچھے پارک کو تالا لگا دیا تھا) ہماری حکومت نے دونوں جگہوں پر تالے کھلوا دیئے۔بانکے بہاری مندر کوریڈور کے لیے بھی فنڈز کا انتظام کیا گیا ہے۔
انہوں نے کہا کہ نشاد راج گوہیا کلچرل سنٹر شرنگور پور کے لیے فنڈز کا انتظام کیا گیا ہے۔ اعظم گڑھ ضلع کے ہریہر پور میں میوزک کالج اور چترکوٹ میں مہارشی والمیکی کلچرل سنٹر کے لیے فنڈز کا انتظام کیا گیا ہے۔تلسی داس جی کی جائے پیدائش راجا پور کے لیے بھی بجٹ میں فنڈز کا انتظام ہے۔ مہاراج وڈور کے نام پر میڈیکل کالج بنا رہے ہیں۔ میں وِدور کوٹی گیا۔ وہاں بحالی کا کام ہو رہا ہے۔
یوگی نے بتایا کہ ہماری حکومت اودا دیوی کے نام پر پی اے سی کی بٹالین بنا رہی ہے۔ ہم لکھنؤ کے قلعے کی مرمت بھی کروا رہے ہیں۔ دیگر مقامات پر قلعوں کی بھی مرمت کی جارہی ہے۔ یہ ہماری ثقافتی سیاحت کا حصہ ہے۔ ایودھیا میں بین الاقوامی رامائن اور ویدک ریسرچ انسٹی ٹیوٹ کے لیے بجٹ کا انتظام کیا گیا ہے۔ ہم ان کو تیزی سے آگے لے جا رہے ہیں۔