نئی دہلی، 23 اپریل (یو این آئی) کانگریس جنرل سکریٹری پرینکا گاندھی واڈرا نے وزیر اعظم نریندر مودی پر اشتعال انگیز اور توجہ بھٹکانے والے بیانات دینے کا الزام لگاتے ہوئے کہا کہ وہ کانگریس کی حکومت بننے پر خواتین کا منگل سوتر چھیننے کی بات کر رہے ہوں، لیکن حقیقت یہ ہے کہ ان کی ماں کا منگل سوتر اس ملک پر قربان ہوا ہے۔
محترمہ واڈرا نے عوام سے سوال کیا کہ ملک میں 55 سال تک کانگریس کی حکومت رہی ہے۔ کسی نے آپ سے آپ کا سونا اور منگل سوتر چھینا۔ اندرا گاندھی نے جنگ میں اپنا سونا ملک کو دیا تھا۔
انہوں نے کہا’’میری ماں سونیا گاندھی کا منگل سوتر اس ملک کے لیے قربان ہوا ہے اور پی ایم مودی کہہ رہے ہیں کہ کانگریس خواتین کا منگل سوتر اور سونا چھین لے گی۔ اگر مودی جی منگل سوتر کی اہمیت کو سمجھتے تو ایسی غیر اخلاقی باتیں نہ کرتے۔ جب کسان پر قرض ہوتا ہے تو اس کی بیوی اپنے زیورات گروی رکھتی ہے۔ بچوں کی شادی ہوتی ہے تو عورتیں اپنا سونا گروی رکھتی ہیں۔
مسز واڈرا نے وزیر اعظم مودی کی پالیسیوں پر بھی حملہ کیا اور کہا کہ ’’نوٹ بندی میں جب خواتین کی بچت لے لی گئی اس وقت مودی جی کہاں تھے۔ لاک ڈاؤن کے دوران جب مزدور پیدل چلے، خواتین نے اپنے زیورات گروی رکھے، تب مودی جی کہاں تھے؟ کسان تحریک میں سینکڑوں کسان شہید ہوگئے، ان کی بیواؤں کے منگل سوتر کے بارے میں مودی جی نے نہیں سوچا۔ منی پور میں جب ایک جوان کی بیوی کو برہنہ گھمایا گیا، تب اس کے منگل سوتر کے بارے میں نہیں سوچا۔ آج ووٹ حاصل کرنے کے لیے خواتین کو ڈرارہے ہیں، مودی جی کوشرم آنی چاہیے۔
انہوں نے کہا کہ یہ الیکشن عوام اور جھوٹ کی طاقت کے درمیان ہے۔ عوام کہہ رہے ہیں کہ وہ بے روزگاری، مہنگائی اور معاشی بحران سے پریشان ہیں لیکن متکبر حکومت اصل مسائل سے توجہ ہٹانے، جھوٹ پھیلانے اور لوگوں کو بھڑکانے میں مصروف ہے۔ ملک کے عوام نے فیصلہ کیا ہے کہ وہ بھٹکانے اوربھڑکانے کی سیاست سے چھٹکارا حاصل کریں گے۔
الیکٹورل بانڈ گھوٹالہ پر ایک بار پھر حملہ کرتے ہوئے کانگریس جنرل سکریٹری نے کہا کہ آج پورے ملک کو پتہ چل گیا ہے کہ نریندر مودی اور بی جے پی کرپٹ ہیں۔ بی جے پی نے انتخابی بانڈز کے ذریعے کالے دھن کو سفید میں تبدیل کرکے چندہ لیا ہے۔
