پاکستانی وزیر اعظم کواقوام متحدہ میں ہندوستان نے دیا”منہ توڑ جواب”

اقوام متحدہ(ایجنسیاں)پاکستانی وزیر اعظم شہباز شریف نے اقوام متحدہ جنرل اسمبلی میں گزشتہ روز کشمیر ایشو کو اٹھایا تھا اور ہندوستان کے خلاف کچھ بیانات بھی جاری کیے تھے۔ اب اس معاملے میں ہندوستان نے جوابی حملہ کیا ہے۔ ہندوستان نے اقوام متحدہ میں اپنے خطاب کے دوران پاکستان کو منھ توڑ جواب دیتے ہوئے کہا ہے کہ ’’امن اور تحفظ تبھی ہوگا جب سرحد پر دہشت گردی ختم ہو جائے گا۔‘‘
اقوام متحدہ میں ہندوستان کے سکریٹری اوّل مجیٹو وینیٹو نے اپنے جواب میں کہا کہ ہندوستان کے خلاف جھوٹے الزامات لگانے سے پہلے پاکستان کو اپنا محاسبہ کرنا چاہیے۔ مجیٹو نے یہ بھی کہا کہ جموں و کشمیر پر دعویٰ کرنے کی جگہ اسلام آباد کو ’سرحد پر دہشت گردی‘ کو روکنا چاہیے۔
وینیٹو مجیٹو نے حملہ آور رخ اختیار کرتے ہوئے کہا کہ ’’جب اقلیتی طبقہ کی ہزاروں کی تعداد میں نوعمر خواتین کا ایس او پی کی شکل میں اغوا کر لیا جاتا ہے، تو ہم اس بارے میں کیا نتیجہ نکال سکتے ہیں؟‘‘ انھوں نے پاکستانی وزیر اعظم شہباز کے بیانات کو افسوسناک بتاتے ہوئے کہا کہ انھوں نے اپنے ہی ملک میں بداعمالیوں کو چھپانے کے لیے ایسے بیانات جاری کیے۔
دراصل اقوام متحدہ جنرل اسمبلی (یو این جی اے) کے اجلاس کو خطاب کرتے ہوئے شہباز شریف نے دعویٰ کیا تھا کہ جموں و کشمیر کے خصوصی درجہ کو بدلنے کے لیے 5 اگست 2019 کو ہندوستان کے ’غلط اور یکطرفہ‘ قدم نے امن کے امکانات کو مزید کمتر کیا ہے اور علاقائی کشیدگی کو بڑھایا ہے۔