امیٹھی، 18 مئی (یو این آئی) کانگریس کی جنرل سکریٹری پرینکا گاندھی واڈرا نے ہفتہ کو امیٹھی لوک سبھا حلقہ میں روڈ شو کیا اور انڈیا الائنس کانگریس امیدوار کشوری لال شرما کی جیت کی اپیل کی۔انتخابی مہم کے آخری دن پرینکا کو دیکھنے کے لیے لوگ اپنے گھروں کی چھتوں پر کھڑے نظر آئے۔ مختلف مقامات پر بچے، بوڑھے، خواتین اور نوجوان پھولوں اور ہاروں کے ساتھ پرینکا گاندھی کا استقبال کرنے کے لیے بے تاب نظر آئے، پرینکا گاندھی نے اپنے مخصوص انداز میں کشوری لال شرما کو جیتانے کی انوکھی اپیل کی ۔
لوک سبھا امیدوار کشوری لال شرما پرینکا کے ساتھ روڈ شو میں موجود تھے، روڈ شو کا آغاز جایس کے بس اسٹینڈ سے ہوا جہاں ایڈوکیٹ حاجی عشرت حسین نے اپنے حامیوں کے ساتھ مل کر پرینکا کا استقبال کیا اور پھولوں کے ہار پہناکر پرینکا گاندھی اور کشوری لال شرما کے تئیں اپنی حمایت اور تعاون کا اظہار کرتے ہوئے نعرے لگائے۔ دریں اثناء
کانگریس کی جنرل سکریٹری پرینکا گاندھی واڈرا نے امیٹھی اور رائے بریلی کو اپنا خاندانی گھر قرار دیتے ہوئے کہا ہے کہ انہوں نے کسی حکمت عملی کے تحت الیکشن نہیں لڑا ہے اور اگر دونوں بھائی بہن الیکشن لڑتے تو اس کا براہ راست فائدہ بھارتیہ جنتا پارٹی (بی جے پی) کو ہوتا ۔محترمہ واڈرا نے کہا کہ گاندھی خاندان رائے بریلی اور امیٹھی کو کبھی نہیں چھوڑ سکتا، اس لیے وہ اپنے حلقے رائے بریلی میں اپنے بھائی راہل گاندھی کی جیت کے لیے دن رات کام کر رہی ہیں۔ انہوں نے یہ بھی کہا کہ بی جے پی نے مسٹر راہل گاندھی کو بدنام کرنے کے لیے اپنی پوری طاقت استعمال کی ہے اور اس کا جواب دینے کے لیے وہ رائے بریلی میں مضبوطی سے کھڑی ہیں۔
مسز واڈرا نے ایک نجی چینل کو انٹرویو دیتے ہوئے کہا، ‘میں امیٹھی اور رائے بریلی کو کبھی نہیں چھوڑ سکتی۔ میں کانگریس کے لیے مہم پر توجہ مرکوز کرنا چاہتی تھی اس لیے میں نے الیکشن نہیں لڑا۔ دوسری بات یہ کہ اگر ہم دونوں بھائی بہن الیکشن لڑتے تو اس کا براہ راست فائدہ بی جے پی کو ہوتا۔بی جے پی پر مسٹرراہل گاندھی کی شبیہ کو خراب کرنے کے لیے اپنی تمام طاقت استعمال کرنے کا الزام لگاتے ہوئے، انہوں نے کہا، ‘بی جے پی نے بہت منظم طریقے سے راہل گاندھی جی کی شبیہ کو خراب کرنے کے لیے کام کیا اور اس پر کروڑوں روپے خرچ کیے ہیں۔ بی جے پی نے راہل گاندھی جی کے بارے میں بہت سی غلط باتیں پھیلائی ہیں۔
انہوں نے کہا، "آج پورا ملک جانتا ہے کہ چاہے کچھ بھی ہو جائے – راہل گاندھی ایک ایسے آدمی ہیں جو سچ بولیں گے، کسی سے نہیں ڈریں گے۔ بی جے پی چاہتی ہے کہ ہمارے خاندان کے ساتھ زیادتی ہو لیکن ہم خاموش رہیں۔ ہم کیوں خاموش رہیں۔ میری دادی نے ملک کے لئے 32 گولیاں کھائیں ہیں۔ میں نے 19 سال کی عمر میں اپنے والد کی شہادت دیکھی ہے۔ میرے کنبہ نے ملک کے لئے قربادی دی ہے۔ مجھے اس بات پر بہت فخر ہے۔محترمہ واڈرا نے کہا، میں گزشتہ 15 دنوں سے رائے بریلی میں انتخابی مہم چلا رہی ہوں۔ گاندھی خاندان کا رائے بریلی سے پرانا رشتہ ہے۔ اس لیے لوگ توقع کرتے ہیں کہ ہم یہاں آئیں گے، ان سے ملیں گے اور ان سے بات کریں گے۔ ہم یہاں ریموٹ کنٹرول کے ذریعے الیکشن نہیں جیت سکتے۔
