اونڈا/پانسکورا(یو این آئی) ترنمول کانگریس کی سپریمو اور مغربی بنگال کی وزیر اعلیٰ ممتا بنرجی نے کہا کہ اگر نریندر مودی کو 2024 کے انتخابات میں اقتدار سے بے دخل نہیں کیا گیا تو آئین ختم ہو جائے گا۔ یہاں انتخابی ریلیوں سے خطاب کرتے ہوئے، محترمہ بنرجی نے کہا، ”ہم دہلی جائیں گے اور منریگا کا کام دوبارہ شروع کریں گے اور ساتھ ہی این آر سی -سی اے اے- یو سی سی کو ہٹائیں گے۔ میں نے پہلے کبھی بھارتیہ جنتا پارٹی (بی جے پی) جیسی بے ادب پارٹی نہیں دیکھی، جو اپنے مخالفین کے ساتھ کم سے کم سیاسی شائستگی بھی نہیں رکھتی۔ کبھی کہتے ہیں کہ اقلیتی طبقہ شیڈول کمیونٹی کا ریزرویشن چھین لے گا۔ کیوں؟ ہمارے اقلیتی بھائی اور بہنیں ایسا کبھی نہیں کریں گے۔ مشن میں حالیہ واقعہ کا حوالہ دیتے ہوئے، محترمہ بنرجی نے کہا، "میں رام کرشنا مشن کے خلاف نہیں ہوں۔ میں کسی بھی تنظیم کے خلاف یا ان کی توہین کیسے کرسکتی ہوں؟ کچھ دن پہلے جب مہاراج کی طبیعت خراب تھی تو میں ان سے ملنے گئی تھی ۔ میں نے صرف ایک یا دو لوگوں کی بات کی تھی۔
دریں اثناء وزیر اعلیٰ ممتا بنرجی نے پیر کے روز کہا کہ ترنمول کانگریس کو زیادہ سے زیادہ نشستیں اس بات کو یقینی بنائے گی کہ وہ مرکز میں حکومت بنانے پر اپوزیشن انڈیا بلاک کی مکمل مدد کر سکے ممتا بنرجی نے دعویٰ کیا کہ وزیر اعظم نریندر مودی کی قیادت والی حکومت کی گارنٹی کوئی یقینی نہیں ہے۔ترنمول کانگریس جو گارنٹی دیتی ہے اس کو پورا کردیتی ہے۔ممتا بنرجی نے کہا کہ دہلی کیلئے وہ ووٹ ہے ۔آپ ہمیں زیادہ سے زیادہ سیٹ دلائیں تاکہ ہم انڈیا اتحاد کی حکومت میں اہم رول ادا کرسکیں گے۔ممتابنرجی نے اپنے الزام کو دہرایا کہ بی جے پی نے سندیش کھالی میں سازش کی ہے۔خواتین کے ساتھ دھوکہ دے کر ترنمول کانگریس کو بدنام کرنے کی کوشش کی گئی ہے۔
2007 میں سی پی آئی (ایم) کی قیادت والی بائیں محاذ کی حکومت کے خلاف نندی گرام میں حصول اراضی کے تحریک کو یاد کرتے ہوئے بنرجی نے کہا کہ وہ اس وقت کے گورنر گوپال کرشن گاندھی کی راست بازی اور مدد کے لیے ان کی ہمیشہ شکر گزار رہیں گی۔وہ (گاندھی) ایک بہت ہی شاندار شخص تھے۔ لیکن میں موجودہ گورنر کے بارے میں بات نہیں کروں گی۔بنرجی نے سی پی آئی (ایم) پر الزام لگایا کہ غیر مقسم مدنی پور میں بڑے پیمانے پر لوگوں پرظلم کیا گیا ہے۔ممتا بنرجی نے گھتال سے پارٹی کے امیدوار دیپک ادھیکاری (بنگلہ اداکار دیو ) کو جتانے کی اپیل کی ۔یواین آئی۔نور
