جھارکھنڈ میں ہاوڑہ-ممبئی میل کے 18 ڈبے پٹری سے اتر گئے
رانچی (یو این آئی) جھارکھنڈ میں ساؤتھ ایسٹرن ریلوے کے چکردھر پور ریلوے ڈویژن کےبڑابمبو اسٹیشن کے نزدیک آج علی الصبح ہاوڑہ سے ممبئی جا رہی 12810ہاوڑہ-ممبئی میل کے کئی ڈبے پٹری سے اتر گئے، جس سے دو لوگوں کی موت ہوگئی جبکہ پانچ دیگر زخمی ہوگئے ہیں ساؤتھ ایسٹرن ریلوے کے سی پی آر او اوم پرکاش چرن نے یہاں یواین آئی کو بتایا کہ اس حادثے میں ہاوڑہ ممبئی میل کے 18 ڈبے پٹری سے اتر گئے، جن میں سے 16 ڈبے مسافر کوچ کے ہیں۔ انہوں نے بتایا کہ اس حادثے میں دو مسافروں کی موت ہوگئی جبکہ پانچ دیگر زخمی ہوگئے جن میں سے ایک کی حالت نازک ہے۔
ریلوے ذرائع نے بتایا کہ راحت اور بچاؤ کے لیے پٹنہ سے این ڈی آر ایف کی ٹیم بھیجی گئی ہے۔ ذرائع نے بتایا کہ راجکھرسواں ویسٹ آؤٹر اور بارابمبو کے درمیان اس سے قبل ایک مال گاڑی پٹری سے اتر گئی تھی جس کی وجہ سے ویگن ٹریک پر ہی تھا کہ تبھی ہاوڑہ-ممبئی میل دوسرے ٹریک سے آرہی تھی اور ان ویگنس سے ٹکرانے کے بعد اس کی بوگیاں بھی پٹری سے اتر گئیں۔
اس حادثے کے ٹرین کے مسافروں کو بسوں کے ذریعے دوسرے قریبی ریلوے اسٹیشن پر بھیجا گیا ہے۔اس روٹ پر چلنے والی 22861 ہاوڑہ-کانٹابازی ایکسپریس، 08015/18019 کھڑکپور-دھنباد ایکسپریس، 12021/12022 ہاوڑہ باربیل ایکسپریس کو ردکرنا پڑا جبکہ کچھ ٹرینوں کو درمیان میں روکنا پڑا۔
