لکھنؤ، 10 ستمبر (یو این آئی) سماج وادی پارٹی (ایس پی) کے صدر اکھلیش یادو نے کہا کہ بھارتیہ جنتا پارٹی (بی جے پی) کی متکبرانہ سیاست پر قابو پا لیا گیا ہے اور یہ یقینی ہے کہ 2027 کے اسمبلی انتخابات میں اتر پردیش سے بی جے پی کا صفایا ہو جائے گا۔مسٹر یادو نے ریاستی دفتر میں پارٹی کارکنوں سے کہا کہ آنے والے ضمنی انتخابات میں بی جے پی تمام سیٹیں ہارنے والی ہے۔ 2027 میں اتر پردیش میں سماج وادی پارٹی کی حکومت بنے گی، اس کی تصدیق 2024 کے لوک سبھا انتخابات سے ہو چکی ہے۔ بی جے پی کی غلط پالیسیوں کی وجہ سے اتر پردیش ترقی کے میدان میں بہت پیچھے رہ گیا ہے۔ بی جے پی حکومت نے اپنے سات سالہ دور اقتدار میں طلباء، نوجوانوں، تاجروں، کسانوں اور مزدوروں کا استحصال کیا ہے۔
انہوں نے کہا کہ بی جے پی کے ڈی این اے میں ہے کہ کسی کو غلطی سے بھی فائدہ نہیں ہونا چاہئے۔ نوٹ بندی اور جی ایس ٹی کی وجہ سے کاروبار تباہ ہو گیا۔ کسانوں کی آمدنی دوگنی کرنے کا وعدہ پورا نہیں ہوا۔ اپنے دور اقتدار میں ایک یونٹ بھی بجلی پیدا نہ کرنے والی بی جے پی حکومت بجلی کے بلوں میں اضافہ کر کے عوام کا استحصال کر رہی ہے۔
