نئی دہلی (یو این آئی) سابق وزیر اعظم منموہن سنگھ کی آج یہاں نگم بودھ گھاٹ پر سرکاری اعزاز کے ساتھ آخری رسومات ادا کی گئیں اور ان کاجسد خاکی کو عناصر خمسہ میں محلول ہوگیا ۔صدر جمہوریہ دروپدی مرمو، نائب صدر جگدیپ دھنکڑ، وزیر اعظم نریندر مودی، لوک سبھا کے اسپیکر اوم برلا، بھوٹان کے بادشاہ جگمے کھیسر نامگیل وانگچک، وزیر داخلہ امت شاہ، وزیر دفاع راجناتھ سنگھ، پارلیمانی امور کے وزیر کرن رجیجو، بھارتیہ جنتا پارٹی ( بی جے پی ) کے صدر جے پی نڈا اور کئی مرکزی وزراء ، دہلی کی وزیر اعلیٰ آتشی، کانگریس صدر ملکارجن کھڑگے، کانگریس پارلیمانی پارٹی کی رہنما سونیا گاندھی، ، کانگریس کے سابق صدر راہل گاندھی، پرینکا گاندھی، تینوں افواج کے سربراہوں کے ساتھ ساتھ کئی مرکزی وزراء، سفارت کاروں اور دیگر معززین نے ان کی آخری رسومات میں شرکت کی۔
قبل ازیں ان کا جسد خاکی کانگریس ہیڈکوارٹر میں آخری دیدار کے لیے رکھا گیا تھا جہاں ان کے افراد خاندان کے ساتھ ساتھ کانگریس کے کئی سرکردہ لیڈروں نے انہیں خراج عقیدت پیش کیا۔ اس کے بعد ان کی جسد خاکی کو قافلے کے ساتھ نگم بودھ گھاٹ لایا گیا۔ ان کے آخری سفر کے لیے بڑی تعداد میں لوگ جمع ہوئے لیکن نگم بودھ گھاٹ پر سخت حفاظتی انتظامات کی وجہ سے جنازے کے جلوس میں گھاٹ پہنچنے کے لیے کانگریس ہیڈکوارٹر سے تقریباً 11 کلومیٹر پیدل چلنے والے تمام لوگوں کو اندر جانے کی اجازت نہیں دی گئی۔
قابل ذکر ہے کہ ڈاکٹر سنگھ کا انتقال دہلی کے آل انڈیا انسٹی ٹیوٹ آف میڈیکل سائنسز (ایمس) میں 26 دسمبر کو رات تقریباً 9 بجے 92 سال کی عمر میں ہوا تھا۔ ڈاکٹر سنگھ کی موت کے بعد ان کی یادگار بنانے کے سلسلے میں کانگریس اور بی جے پی کے درمیان کافی سیاست چل رہی ہے، حالانکہ حکومت نے واضح کر دیا ہے کہ ایک ٹرسٹ بنا کر ڈاکٹر سنگھ کی یادگار بنائی جائے گی ۔
ڈاکٹر سنگھ 2004 سے 2014 تک دو بار ملک کے وزیر اعظم رہے۔ اس سے قبل 1991 میں پی۔ وی۔ نرسمہا راؤ حکومت میں وزیر خزانہ کے طور پر انہوں نے ملک میں لبرل اقتصادی اصلاحات نافذ کیں، جس نے ملک کی معیشت کو نئی بلندیوں تک پہنچایا۔
1954 میں پنجاب یونیورسٹی سے معاشیات میں ایم اے کرنے کے بعد انہوں نے کیمبرج سے فرسٹ کلاس اکنامکس (آنرز) کی اور 1962 میں آکسفورڈ سے ڈی فل کیا۔ وہ 1971 میں حکومت ہند کی وزارت تجارت میں اقتصادی مشیر، 1972 میں وزارت خزانہ میں چیف اکنامک ایڈوائزر اور 1980 سے 1982 تک پلاننگ کمیشن کے رکن کے عہدے پر فائز رہے۔ڈاکٹر سنگھ 1982-1985 تک ریزرو بینک کے گورنر رہے اور 1985 میں پلاننگ کمیشن کے نائب چیئرمین بنے۔ پھر انہیں 1990 میں وزیراعظم کا اقتصادی مشیر مقرر کیا گیا۔ انہوں نے دہلی یونیورسٹی میں بطور پروفیسر بھی خدمات انجام دیں۔
