نئی دہلی (یو این آئی) دہلی کی وزیرِ اعلیٰ ریکھا گپتا نے منگل کے روز کہا کہ ان کی حکومت کچی آبادیوں کو ان کا حق یعنی پکا گھر اور ہر بنیادی سہولت فراہم کرنے کے لیے پرعزم ہے۔ محترمہ گپتا نے آج یہاں بھلسوا علاقے میں بنے ای ڈبلیو ایس فلیٹس کا معائنہ کیا۔ سال 2016 میں تیار ہونے کے باوجود برسوں سے خالی پڑے ان فلیٹس کو دیکھ کر وزیرِ اعلیٰ نے سخت ناراضگی ظاہر کی اور اسے دہلی کے غریب کنببے کے ساتھ بڑا ظلم قرار دیا۔
انہوں نے گزشتہ حکومتوں پر سخت تنقید کی اور کہا کہ ان کی حکومت مسلسل کچی آبادیوں کو ان کا حق یعنی پکا مکان اور تمام بنیادی سہولتیں دینے کے لیے کوشاں ہے۔ اسی مقصد کے تحت آج ان فلیٹس کی موجودہ حالت کا جائزہ لیا گیا ہے۔
انہوں نے متعلقہ محکمے کے افسروں کو ہدایت دی کہ ان فلیٹس کو جلد از جلد درست حالت میں لایا جائے، تاکہ انہیں جھگی کے لوگوں کو الاٹ کیا جا سکے۔انہوں نے کہا کہ ان کی حکومت ان لاکھوں غریب کنبے کی بہتری کے لیے مسلسل کام کر رہی ہے، جو آج بھی جھگیوں میں رہنے پر مجبور ہیں۔انہوں نے بھلسوا کمپلیکس میں بنے 7,400 فلیٹس کا ذکر کرتے ہوئے بتایا کہ یہ فلیٹس 2016 میں تیار ہوئے تھے اور اب ان کی حالت کھنڈر جیسی ہو چکی ہے۔ گزشتہ حکومت نے ان مکانوں کو کسی بھی غریب کنبے کو الاٹ نہیں کیا۔ یہ دہلی کے عوام کے ساتھ کتنا بڑا دھوکہ ہے۔
وزیرِ اعلیٰ نے سوال اٹھایا کہ اگر اس وقت یہ فلیٹس غریبوں کو دے دیے گئے ہوتے، تو آج وہ کنبے اپنے گھروں میں عزت اور سکون کے ساتھ رہ رہے ہوتے۔ سالوں تک خالی پڑے رہنے کی وجہ سے یہ مکان خستہ حال ہو گئے اور ان میں رکھا سامان بھی غائب ہو گیا۔وزیرِ اعلیٰ نے بتایا کہ دہلی حکومت نے جھگی بستیوں کی بازآبادکاری کے لیے ایک نیا، جدید اور تمام ضروری سہولتوں سے آراستہ ماڈل تیار کیا ہے۔اس ماڈل کے تحت بھلسوا کے فلیٹس کو مکمل طور پر درست کرکے انہیں تمام سہولتوں سے لیس جدید رہائشی کمپلیکس کے طور پر تیار کیا جائے گا۔انہوں نے بتایا کہ یہاں ای رکشا کے لیے چارجنگ اسٹیشن، کاروبار کے لیے محفوظ جگہیں، پارکنگ، صحت کی سہولتیں، پارک اور آنگن واڑی جیسی سہولتیں فراہم کی جائیں گی۔
