عمرہ ویزے کی مدت بڑھ گئی،عازمین کا کسی بھی ایئرپورٹ سےداخلہ بھی ممکن
ریاض(ایجنسیاں) : سعودی عرب نے عمرہ ویزے کی مدت ایک ماہ سے بڑھا کرتین ماہ کر دی ، جس کے بعد عازمین کسی بھی ایئرپورٹ سےمملکت میں داخل ہوسکتے ہیں۔
تفصیلات کے مطابق عمرہ ادا کرنے والے افراد کیلئے نئی خوشخبری آگئی ، سعودی عرب نے عمرہ ویزے کی مدت ایک ماہ سے بڑھا کرتین ماہ کر دی۔
اس حوالے سے سعودی حکام نے بتایا کہ عمرہ کیلئے آنے والے افراد مکہ اورمدینہ سمیت دیگر شہروں میں بھی جا سکیں گے اور عازمین کسی بھی ائیرپورٹ سے مملکت میں داخل ہوسکتے ہیں۔
سعودی وزارت کا کہنا ہے عازمین اس بات کویقینی بنائیں کہ مقررہ مدت میں عمرہ مکمل کریں اور ویزا کی مدت ختم ہونے سے پہلے روانہ ہوجائیں۔
یاد رہے گذشتہ ہفتے سعودی وزارت حج وعمرہ نے بیرون مملکت سے عمرہ ویزے پرآنے والے زائرین کے لیے میڈیکل انشورنس پالیسی حاصل کرنا ضروری قرار دیا تھا۔
وزارت حج و عمرہ کا کہنا تھا کہ بیرون مملکت سے عمرہ ویزے پرآنے والے زائرین کو انشورنس پالیسی سے فائدہ ہوگا،میڈیکل انشورنس پالیسی کا پریمیم عمرہ ویزے کی فیس کے ساتھ وصول کیا جائے گا، میڈیکل پالیسی تمام ہنگامی نوعیت کے طبی اور دیگر معاملات کو کور کرے گی۔
