بہار کے نوتقرر نائب وزیر اعلیٰ تیجسوی یادو نے ای ڈی، سی بی آئی اور انکم ٹیکس محکمہ کو اپنی رہائش کے اندر دفتر کھولنے اور جو کچھ بھی چاہیں اس کی جانچ کرنے کے لیے مدعو کیا ہے۔ تیجسوی یادو نے کہا کہ ہمیں اس سے کوئی اعتراض نہیں ہے۔ انھوں نے مزید کہا کہ ’’ہم چاہتے ہیں کہ ای ڈی، سی بی آئی، انکم ٹیکس کے لوگ میرے گھر کے اندر میں ہی دفتر کھولیں۔ پھر بھی اگر انھیں سکون نہ ملے تو میں کیا کر سکتا ہوں۔ وہ ہمارے خلاف جو بھی جانچ کرنا چاہتے ہیں، کر لیں، اس سے ہمیں کوئی اعتراض نہیں ہے۔‘‘
یہ بھی پڑھیں : کیا واقعی نتیش کمار نائب صدر بننا چاہتے تھے؟ نتیش نے خود دیا اس سوال کا جواب
تیجسوی یادو کا کہنا ہے کہ ’’جنتا دل یو کے قومی صدر للن سنگھ نے ٹھیک ہی کہا کہ ہمارے پاس چھپانے کے لیے کچھ نہیں ہے اور ہم مرکزی ایجنسیوں سے ڈرتے نہیں ہیں۔ انھوں نے مجھے بہت پہلے چارج شیٹ کیا ہے، ان کے پاس میرے خلاف ثبوت نہیں ملا۔ معاملہ (آئی آر سی ٹی سی گھوٹالہ) ایسے وقت میں ہوا جب میری داڑھی اور مونچھ نہیں تھی۔‘‘ آر جے ڈی لیڈر نے یہ بھی کہا کہ ’’بہار کے نائب وزیر اعلیٰ کی شکل میں 18 ماہ کی مدت کار کے دوران مجھ پر بدعنوانی کا ایک بھی الزام نہیں لگا۔ ہمارے پاس آر جے ڈی کوٹے کے تحت 18 وزیر تھے اور ان میں سے کوئی بھی کسی بھی طرح کی بدعنوانی کے معاملے میں شامل نہیں تھا۔‘‘
