دہلی کے کارپوریشن انتخابات کے لیے بی جے پی کا منشور جاری

نئی دہلی (یو این آئی) بھارتیہ جنتا پارٹی نے جمعہ کو دہلی میونسپل کارپوریشن (ایم سی ڈی) کے انتخابات کے لئے اپنا منشور ‘سنکلپ پتر’ جاری کیا۔مرکزی وزیر پیوش گوئل نے دہلی بی جے پی کے ریاستی صدر آدیش گپتا اور دیگر سینئر لیڈروں کی موجودگی میں پارٹی کا منشور ‘سنکلپ پتر’ جاری کیا، جس میں شہر کی جھگی میں رہنے والوں کو فلیٹس سمیت کئی خدمات کا وعدہ کیا گیا ہے۔
مسٹرآدیش گپتا نے 12 نکاتی منشور پڑھتے ہوئے کہا کہ دہلی میونسپل کارپوریشن کی تمام خدمات ایک موبائل ایپلیکیشن کے ذریعے آن لائن کی جائیں گی۔ انہوں نے کہا کہ سبز اور صاف دہلی کے لیے صد فیصد کچرے کا انتظام کیاجائے گا اور ہر جھگی میں رہنے والوں کو فلیٹ فراہم کیا جائے گا، 17000 فلیٹ الاٹمنٹ کے لیے تیار ہیں۔
انہوں نے کہا کہ ایم سی ڈی اسکولوں میں ہونہار لڑکیوں کو مفت سائیکل دی جائے گی۔ایم سی ڈی کے 250 وارڈوں کے لیے انتخابات 4 دسمبر کو ہوں گے اور ووٹوں کی گنتی 7 دسمبر کو ہوگی۔