مرکزی حکومت چین کے ساتھ تجارت بند کرے: سنجے سنگھ

لکھنؤ (یو این آئی) عام آدمی پارٹی (اے اے پی) کے رکن پارلیمنٹ سنجے سنگھ نے پیر کو کہا کہ چین ہمارے ملک میں مسلسل دراندازی کر رہا ہے اور ملک کی سلامتی کو نقصان پہنچا رہا ہے اور موجودہ حکومت اس کے ساتھ کاروبار کرکے ملک کے فوجیوں کی قربانی کا مذاق اڑارہی ہے۔
مسٹر سنگھ نے کہا کہ چین کے ساتھ تجارت کو فوری طور پر بند کیا جانا چاہئے اور ملک کے فوجیوں کی ہمت اور قربانی کی تعریف کی جانی چاہئے۔ مرکز کو بتانا چاہئے کہ 7.5 لاکھ کروڑ روپے کی تجارت دشمن ملک چین کو کیوں دی جا رہی ہے۔ گلوان تصادم کے بعد جب مرکزی حکومت نے اقتصادی پابندیاں لگانے کی بات کی تو درآمدات میں کیسے 31 فیصد اضافہ ہوا۔
اعداد و شمار پیش کرتے ہوئے اے اے پی کے راجیہ سبھا کے رکن سنجے سنگھ نے کہا کہ سال 2021 میں چین کی ہندوستان کے ساتھ کل تجارت 125.66 ارب ڈالر تھی، جو کہ سال 2020 کے مقابلے میں 43.3 فیصد سے زیادہ ہے۔ یہ انتہائی افسوسناک پہلو ہے کہ ہندوستانی حکومت کی چین کے تئیں غیر واضح پالیسیاں نہ صرف چین کو مضبوط کررہی ہیں بلکہ قومی سلامتی اور ہندوستانی فوج کی قربانیوں کو بھی نقصان پہنچا رہی ہیں۔