پیشہ ورانہ اہلیت پر آن لائن ورکشاپ کا انعقاد

علی گڑھ(پریس ریلیز): علی گڑھ مسلم یونیورسٹی (اے ایم یو) کے پوسٹ ہارویسٹ انجینئرنگ اینڈ ٹکنالوجی شعبہ نے ’’کیمپس سے کارپوریٹ تک: پیشہ ورانہ اہلیت پیدا کریں‘‘ موضوع پر سلیپ ویل فاؤنڈیشن اور نالج پارٹنر ’میک لیڈ سرٹیفیکیشن‘ کے اشتراک سے تین روزہ آن لائن ورکشاپ کا انعقاد کیا۔
افتتاحی سیشن سے خطاب کرتے ہوئے مہمان خصوصی پروفیسر رئیس احمد (ڈین، فیکلٹی آف ایگریکلچرل سائنسز) نے کارپوریٹ دنیا کے چیلنجز پر گفتگو کرتے ہوئے شرکاء پر زور دیا کہ وہ اپنی علمی اور پیشہ ورانہ مہارت کو بہتر کریں ۔
مہمان اعزازی پروفیسر صدف زیدی (صدر شعبہ) نے موثر قائدانہ خوبیاں پیدا کرنے کی اہمیت پر روشنی ڈالی اور کہا کہ ورکشاپ کا موضوع ہمارے طلباء کو روزگار کے لئے زیادہ سے زیادہ اہل بنانے میں مددگار ثابت ہوگا۔ انہوں نے ورکشاپ کے انعقاد میں تعاون کے لیے شعبہ کے سابق طالب علم ڈاکٹر آدتیہ بھوشن شرما، ایسوسی ایٹ ڈائریکٹر، میک لیڈ سرٹیفیکیشن کا شکریہ ادا کیا۔
پروفیسر چندر شیکھر، سی ای او، میک لیڈ سرٹیفیکیشن پرائیویٹ لمیٹڈ نے خطبہ استقبالیہ پیش کیا ، جب کہ روبی گپتا، چیف ہیومن ریسورس آفیسر (شیلا فوم لمیٹڈ) نے افتتاحی کلمات ادا کیے۔ میک لیڈ سرٹیفیکیشن کی محترمہ پروین گوتم نے افتتاحی سیشن کی نظامت کی۔
شکریہ کے کلمات ادا کرتے ہوئے آرگنائزنگ سکریٹری ڈاکٹر فیضان احمد نے کہا کہ تین روزہ ورکشاپ کے دوران دس سیشن ہوئے جن میں میک لیڈ سرٹیفیکیشن کے ٹرینرز پروین گوتم، سبھاش چندر شرما اور مسٹر شون کمار منوچا نے بطور ریسورس پرسن مختلف موضوعات پر گفتگو کی۔ انھوں نے خاص طورسے شخصیت کی نشوونما، سماجی آداب، ٹائم مینجمنٹ، ماہانہ اور روزانہ کی منصوبہ سازی، تناؤ کا بندوبست، ٹیم ورک، بایوڈاٹا اور انٹرویو کی تیاری جیسے امور پر اظہار خیال کیا ۔مہمان خصوصی ٹی پی او (جنرل) مسٹر سعد حمید نے کارپوریٹ زندگی میں مثبت رویہ اپنانے کی اہمیت پر زور دیا ۔ انہوں نے طلباء کو انٹرویو کی تیاری اور متعلقہ امور کے بارے میں قیمتی مشورے دئے۔ مہمان اعزازی ڈاکٹر زیڈ آر اے آزاد نے اپنے تجربات سے مستفید کیا۔ پروفیسر صدف زیدی اور مسٹر سعد حمید نے شرکاء میں اسناد تقسیم کئے۔