مدورائی میں المناک سانحہ۔۔۔ریلوے کوچ میں آگ لگی، 10 ہلاک

مدورائی (یو این آئی) تمل ناڈو کے مدورائی میں آج علی الصبح ایک ریلوے کوچ میں آگ لگنے سے کم از کم 10 افراد ہلاک ہوگئے۔ مدورائی کے یارڈ میں کھڑا ریلوے کا یہ سلیپر کوچ ایک پرائیویٹ پارٹی کیلئے آئی آر سی ٹی سی کے ذریعے آن لائن بک کیا گیا تھا اور ایل پی جی سلنڈر غیر قانونی طور پر لے جانے کی وجہ سے یہ حادثہ پیش آیا۔سدرن ریلوے کے ترجمان نے یہاں بتایا کہ واقعہ کی تحقیقات کا حکم دے دیا گیا ہے۔ سدرن ریلوے کے جنرل منیجر، مدورائی کے ڈویژنل ریلوے منیجر اور اعلیٰ حکام پہنچ چکے تھے۔
واقعے کے حوالے سے ترجمان نے کہا کہ ہفتہ کی صبح 5.15 بجے ایک پرائیویٹ پارٹی کی جانب سے بک کئے گئے کوچ میں آگ لگنے کی اطلاع ملی۔ یہ کوچ مدورائی یارڈ میں پارک کیا گیا تھا۔ فائر انجنوں کو فوری طور پر طلب کیا گیا جو صبح 5.45 بجے پہنچے اور صبح 7 بجے تک آگ پر قابو پالیا گیا۔کسی اور کوچ کو کوئی نقصان نہیں پہنچا۔ اس حادثے میں 10 لوگوں کے ہلاک ہونے کی خبر ہے۔ جبکہ 7 دیگر زخمی ہوئے ہیں جنہیں علاج کے لیے اسپتال لے جایا گیا ہے۔ترجمان نے کہا کہ اس کوچ میں لکھنؤ سے 65 مسافروں کی ایک پرائیویٹ پارٹی تھی جو ٹرین نمبر 16730 (مدورائی – پنالور ایکسپریس) کے ذریعے آج صبح 3.47 بجے مدورائی پہنچی۔ پارٹی کوچ کو الگ کر کے مدورائی سٹیبلنگ لائن پر کھڑا کر دیا گیا۔ جب کوچ پارک کیا گیا تو پرائیویٹ پارٹی کوچ میں موجود کچھ پارٹی ممبران غیر مجاز طورسے غیر قانونی طور پر اسمگل شدہ ایل پی جی سلنڈر کو چائے/ناشتہ کی تیاری کے لیے استعمال کر رہے تھے جس کی وجہ سے کوچ میں آگ لگ گئی۔ آگ لگنے کی اطلاع ملتے ہی زیادہ تر مسافر کوچ سے باہر نکل گئے۔ کوچ کے الگ ہونے سے پہلے ہی کچھ مسافر پلیٹ فارم پر اتر چکے تھے۔