نئی دہلی، 30 اپریل (یو این آئی) ایڈمرل دنیش کے ترپاٹھی نے منگل کو یہاں 26ویں چیف آف نیول اسٹاف کے طور پر ہندوستانی بحریہ کی کمان سنبھالی۔انہیں ایڈمرل آر ہری کمار کی جگہ بحریہ کا نیا سربراہ مقرر کیا گیا ہے جو بحریہ میں طویل اور شاندار کیریئر کے بعد ریٹائر ہوئے تھے۔ ایڈمرل ترپاٹھی اس سے قبل بحریہ کے نائب سربراہ تھے۔ہندوستانی بحریہ کی کمان سنبھالنے کے بعد مسٹر ترپاٹھی نے کہا کہ وہ بحریہ کو جدید ترین ٹیکنالوجی سے لیس کرنے کے لیے کام کریں گے اور بحریہ نیشن فرسٹ کے فلسفے پر کام کرتے ہوئے تمام چیلنجز سے نمٹنے کے لیے ہمیشہ تیار رہے گی۔ بحریہ کے نئے سربراہ نے کہا “میں ہندوستانی بحریہ کا چھبیسویں چیف آف نیول اسٹاف بننے پر انتہائی فخر اور اعزاز محسوس کر رہا ہوں۔ مجھ سے پہلے بحریہ کے 25 سربراہان نے اپنی محنت اور لگن کے ذریعے ہماری بحریہ کے لڑاکا کو تیار، قابل اعتماد، منظم اور مستقبل کی قوت بنایا ہے۔ میری کوشش رہے گی کہ ہندوستانی بحریہ کو مزید خود انحصار، مضبوط اور ٹیکنالوجی سے لیس بنایا جائے۔ اس بات کو یقینی بنانے کی میری پوری کوشش ہوگی کہ ہندوستانی بحریہ کسی بھی وقت، کہیں بھی، ہمیشہ ہمارے ملک کے بحری مفادات اور سمندری دفاع دونوں کی خدمت کرتی ہے –
میں آپ کے ذریعے تمام ہندوستانیوں کو یقین دلانا چاہتا ہوں کہ آپ کی بحریہ ہمیشہ ’نیشن فرسٹ‘ کے فلسفے پر عمل کرتے ہوئے آپ کے ساتھ کھڑی ہے۔ایڈمرل ترپاٹھی سینک اسکول ریوا اور نیشنل ڈیفنس اکیڈمی کھڑکواسلا کے سابق طالب علم ہیں۔ انہیں یکم جولائی 1985 کو نیوی کی ایگزیکٹو برانچ میں تعینات کیا گیا۔ مواصلات اور الیکٹرانک جنگ کے ماہر کے طور پر انہوں نے بحریہ کے فرنٹ لائن جنگی جہازوں پر بطور سگنل کمیونیکیشن آفیسر اور الیکٹرانک وارفیئر آفیسر اور بعد میں ایگزیکٹو کے طور پر خدمات انجام دیں۔انہوں نے آئی این ایس وناش، کرچ اور ترشول جیسے جنگی جہازوں کی کمانڈ کی۔ تقریباً 40 سال پر محیط کیرئیر کے دوران انہوں نے مختلف اہم آپریشنل اور عملے کی تقرری کی۔
